როგორია ვითარება ამ დროისთვის მთიან ყარაბაღში - სომხეთ-აზერბაიჯანის საზღვარზე ომი გრძელდება

სომხეთ-აზერბაიჯანის საზღვარზე შეიარაღებული შეტაკებები გრძელდება. სომხური მედია იუწყება, რომ სომხეთის შეიარაღებულმა ძალებმა წარმატებას მიაღწიეს.

"ჩვენმა შეიარაღებულმა ძალებმა მნიშვნელოვან წარმატებას მიაღწიეს“, - წერს სომხეთის თავდაცვის სამინისტროს წარმომადგენელი არცრუნ ჰოვანისიანი "ფეისბუქის" ოფიციალურ გვერდზე.

მისივე ცნობით, ზოგიერთ ტერიტორიაზე საარტილერიო ბრძოლა მიმდინარეობს. "ჩვენი ჯარის დანაკარგების შესახებ აზერბაიჯანული მხარის მიერ გავრცელებული ინფორმაცია სიმართლეს არ შეესაბამება,“- აღნიშნავს ჰოვანისიანი.

ცნობისთვის, აზერბაიჯანის თავდაცვის უწყების ინფორმაციით, განადგურებულია სომხური მხარის საბრძოლო მასალის 3 საწყობი, ათობით ტექნიკა, დაღუპულთა და დაშავებულთა რიცხვი 550-ია. აღსანიშნავია, რომ სანამ აზერბაიჯანი ამ ინფორმაციას გაავრცელებდა, მანამდე სომხურმა მხარემ განაცხადა, რომ განადგურებულია აზერბაიჯანის არმიის 4 ვერტმფრენი, 33 ტანკი და საბრძოლო მანქანა, ასევე 27 უპილოტო საფრენი აპარატი. მათივე მტკიცებით, არიან დაღუპულები და დაჭრილები, თუმცა აზერბაიჯანული მხარე ინფორაციას მალავს.

აზრებაიჯანის თავდაცვის სამინისტროში აცხადებენ, რომ 28 სექტემბრის დილიდან ქალაქ ტერტერზე სომხეთის მხრიდან შეტევა ხორციელდება.

სამინისტროს ინფორმაციით, მათ სომხურ მხარეს უკანასკნელი გაფრთხილება მისცეს იმის შესახებ, რომ "აზერბაიჯანი შესაბამის საპასუხო ზომებს მიიღებს“.

აზერბაიჯანული მედიის ინფორმაციით, სომხეთის შეიარაღებული ძალები მშვიდობიან მოსახლეობაზე თავდასხმას განაგრძობს. მათი ცნობით, სოფელ ევოღლუში ერთ-ერთ საცხოვრებელ სახლზე განხორციელებული შეტევის შედეგად მშვიდობიანი მოქალაქე დაიღუპა.

აზერბაიჯანსა და სომხეთში, ორივე ქვეყანაში საომარი მდგომარეობა და საყოველთაო მობილიზაციაა გამოცხადებული.