სომხეთის მთავრობამ საომარი მდგომარეობა შემოიღო და საყოველთაო მობილიზაცია გამოაცხადა - საქართველოს საგარეო უწყებისა და პრეზიდენტის კომენტარები

სომხეთის მთავრობამ ყარაბაღში მიმდინარე მოვლენებთან დაკავშირებით, ქვეყანაში სამხედრო მდგომარეობა შემოიღო და გამოცხადებულია საყოველთაო მობილიზაცია, ამის შესახებ სომხეთის პრემიერმინისტრმა ნიკოლ ფაშიანიანმა „ფეისბუკის“ პირად გვერდზე დაწერა.

„ძვირფასო თანამემამულენო, ახლა სომხეთის მთავრობის გადაწყვეტილებით ცხადდება სამხედრო მდგომარეობა და საყოველთაო მობილიზაცია. ყველა პირად შემადგენლობას მოვუწოდებ გამოცხადდეს სამხედრო კომისარიატებში“, - წერს ფაშინიანი.

ყარაბაღში მიმდინარე მოვლენებით შეშფოთებულია საქართველოს საგარეო საქმეთა სამინისტრო, რომელიც საგანგებო განცხადებას ავრცელებს.

როგორც უწყების მიერ გავრცელებულ ინფორმაციაშია ნათქვამი, საქართველო მზადაა ნებისმიერი ფორმით ხელი შეუწყოს დეესკალაციას და რეგიონში მშვიდობას დამყარებას.

„შეშფოთებით ვაკვირდებით აზერბაიჯანსა და სომხეთს შორის მორიგ სამხედრო გამწვავებას, რომელსაც გავრცელებული ინფორმაციით, უკვე მოჰყვა მსხვერპლი და ინფრასტრუქტურის დაზიანება. იმედი გვაქვს, რომ მოხერხდება ცეცხლის შეწყვეტის შესახებ შეთანხმების მიღწევა, მოლაპარაკებების რეჟიმში გადასვლა მხარეებს შორის და ფართომასშტაბიანი სამხედრო მოქმედებების თავიდან აცილება, რაც მკვეთრად ნეგატიურად იმოქმედებს მთელი რეგიონის უსაფრთხოებაზე.

საქართველო მოვუწოდებს ეუთოს მინსკის ჯგუფის თანათავმჯდომარეებს, საერთაშორისო აქტორებს, მთელი ძალისხმევა მიმართონ ესკალაციის შეწყვეტის და კონსტრუქციული დიალოგის განახლების უზრუნველყოფისათვის.

ჩვენი მხრივ კი ვაცხადებთ, რომ საქართველო მზადაა ნებისმიერი ფორმით ხელი შეუწყოს დეესკალაციას და რეგიონში მშვიდობას დამყარებას“, - ნათქვამია უწყების ინფორმაციაში.

აზერბაიჯანსა და სომხეთს შორის მორიგ სამხედრო გამწვავებას ეხმაურება ასევე საქართველოს პრეზიდენტი სალომე ზურაბიშვილი.

სოციალურ ქსელში სალომე ზურაბიშვილი პოსტს აქვეყნებს და მხარეებს მშვიდობისკენ მოუწოდებს.

„ძალიან ვარ შეშფოთებული სომხეთსა და აზერბაიჯანს შორის საბრძოლო მოქმედებების განახლებით. ჩვენ მოვუწოდებთ მშვიდობისკენ. ჩვენს რეგიონში სტაბილურობა და მშვიდობა უნდა იყოს ჩვენი საერთო საქმე“, - აცხადებს საქართველოს პრეზიდენტი.