შსს თამაზ მეჭიაურის მძღოლის თვითმკვლელობის ცდამდე მიყვანის ფაქტზე განცხადებას ავრცელებს
შინაგან საქმეთა სამინისტრომ თიანეთის მუნიციპალიტეტში მომხდარ თვითმკვლელობის ცდამდე მიყვანის ფაქტზე გამოძიება სისხლის სამართლის კოდექსის 115-ე მუხლის პირველი ნაწილით დაიწყო. ამის შესახებ ინფორმაციას შსს ავრცელებს.
უწყების ინფორმაციით, ჩატარებული საგამოძიებო ღონისძიებებით დადგინდა, რომ 1997 წელს დაბადებულმა გ.ხ.-მ მიმდინარე წლის 17 სექტემბერს თვითმკვლელობა სცადა.
"გამოძიების ფარგლებში ჩატარდა გ.ხ.-ს დედისა და სხვა მოწმეთა გამოკითხვები. პოლიცია განაგრძობს ყველა იმ პირის გამოკითხვას, ვინც შესაძლოა გამოძიებისთვის საინტერესო ინფორმაციას ფლობდეს. დაინიშნა ექსპერტიზები და ტარდება ყველა საჭირო საგამოძიებო მოქმედება. გ.ხ. გადაყვანილია საავადმყოფოში და შესაბამისი მკურნალობა უტარდება“, - ნათქვამია ინფორმაციაში.
ცნობისთვის, თიანეთის მერის, თამაზ მეჭიაურის მძღოლმა თვითმკვლელობა სცადა. 22 წლის გიორგი ხუმარაშვილი სახლში დედამ იპოვა და სასწრაფოდ კლინიკაში გადაიყვანეს, მისი მდგომარეობა მძიმეა, ახლგაზრდა მართვით სუნთქვაზე იმყოფება.
მედიაში გავრცელებული ინფორმაციით, მომხდარის მიზეზი სავარაუდოდ, დაპირისპირებაა. როგორც ბიჭის ოჯახის წევრები ამბობენ, თიანეთის მუნიციპალიტეტის ერთ-ერთი სოფლის რწმუნებული, ზურაბ ბექაური გიორგი ხუმარაშვილს, თამაზ მეჭიაურის შესახებ კონფიდენციალური ინფორმაციის მიწოდებას სთხოვდა, აღნიშნული ინფორმაცია კი, ბექაურს "ქართული ოცნების" მაჟორიტარ კანდიდატთან, შალვა კერესელიძესთან მიჰქონდა.
როგორც "ტვ პირველთან" გიორგი ხუმარაშვილის დედა ამბობს, ახალგაზრდაზე ზურაბ ბექაურის მხრიდან ფსიქოლოგიური ზეწოლა მუდმივად იყო და ბიჭმა ზეწოლას ვერ გაუძლო.
პოლიციამ დააკავა პირი, რომელმაც რუისპირში თანასოფლელი სანადირო თოფით მოკლა
თბილისში, რესტორანში ორი ადამიანი დაჭრეს - რა განცხადებას ავრცელებს შსს
