"ახლა მთავარია როგორმე შევაკავოთ ინფექცია" - რა შემთხვევაში შეიძლება უმკურნალონ შინ კოვიდპაციენტებს?

ბოლო დღეებია საქართველოში ყოველდღიურად covid-19 -ის ანტირეკორდი მყარდება - გამოვლენილ შემთხვევათა რაოდენობა სტაბილურად ასს აჭარბებს. სპეციალისტების თქმით, ეს მაჩვენებელი საქართველოსნაირი პატარა ქვეყნისთვის სერიოზული გამოწვევაა. მედიკოსების პროგნოზით, ბოლოდროინდელი სტატისტიკა თუ შენარჩუნდება, კლინიკები პაციენტების მიღებას ვეღარ შეძლებენ და ინფიცირებულთა დიდ რაოდენობას სახლის პირობებში მოუწევს მკურნალობა.

კორონავირუსის გავრცელების მოსალოდნელ სცენართან დაკავშირებით AMBEBI.GE ინფექციური საავადმყოფოს ბოქსირებული განყოფილების ხელმძღვანელს, მარინა ენდელაძეს ესაუბრა.

- იძლევა თუ არა განგაშის საფუძველს კორონავირუსის საქართველოში გავრცელების სტატისტიკა?

- პანიკა ზოგადად კარგი არ არის, მარამ შიში კი ნამდვილად უნდა გვქონდეს - ეს რაოდენობა ძალიან საგანგაშო არ არის, თუმცა საფრთხილოა და საშიშიც. ყოველღიურად ანტირეკორდი ფიქსირდება, რაც ჩვენისთანა პატარა ქვეყნისთვის არ არის უბრალო რამ. ჩვენ ასეთ მზარდ სტატისტიკას უფრო ზამთრისთვის ველოდით, ცოტა ადრე დაიწყო მატება. შემოდგომის მიწურულს და ზამთრის პერიოდში, როცა რესპირატორული ვირუსებიც გააქტიურდება, მერე უფრო მძიმე იქნება სიტუაცია, რადგან შეიძლება კორონავირუსი და გრიპის ვირუსი ერთდროულად შეხვდეს ადამიანს, რაც კიდევ უფრო გაართულებს მის გამოჯანმრთელებას. ამიტომ ძალიან სერიოზული სიფრთხილე გვჭირდება. ახლა ერთი რამეზე უნდა ვიყოთ ორიენტირებული - როგორმე შევაკავოთ ინფექცია.

- რატომ დაიწყო შემთხვევების რეკორდული მატება იმაზე ადრე, ვიდრე ელოდით?

- ეს ერთის მხრივ იმას უკავშირდება, რომ ძალიან აქტიურად მიდის დატესტვა და მასიურ დატესტვაში ბევრი შემთხვევა გამოვლინდება, რაც კარგია. თუ მაქსიმალურად არ გამოვლინდა ინფიცირებულები, შეკავება გახდება შეუძლებელი. გარდა ამისა, შემთხვევების ასეთი მატება წლევანდელ ზაფხულს უკავშირდება. მთელი საქართველო ვერსად სხვაგან ვერ წავიდა და აქტიურად ისვენებდნენ ზღვაზე თუ მთაში. მესმის, მოსახლეობასაც უნდა დასვენება, მაგრამ რეგულაციების დაცვა იყო აუცილებელი. როგორც ვიცით, სხვა დამატებითი და მკაცრი რეგულაციების შემოღებაზე ჯერ არ არის ლაპარაკი, არავის გვინდა სახლში ამოკეტვა. ამიტომ უნდა დავიცვათ მკაცრად რეკომენდაციები

- თქვენი კოლეგების მოსაზრებით, თუ შემთხვევების მატება სამნიშნა ციფრით შენარჩუნდება, კლინიკები პაციენტებს ვეღარ მიიღებენ. რამდენად სარისკოა შინ მკურნალობა? ყოფილა თუ არა შემთხვევები, რომ პაციენტი უეცრად დამძიმებულა და იმის გამო, რომ სახლში მკურნალობდა და ფატალური შედეგი დამდგარა?

- ვხვდები რომელ შემთხვევაზეც მესაუბრებით, რაც საქართველოში მოხდა ეს (კალათბურთელ ვიქტორ სანიკიძის დედა - ავტ.) , თუმცა არაორდინალური შემთხვევა იყო. ის პაციენტი არ ექვემდებარებოდა შინ მკურნალობას, რადგან ჰქონდა სერიოზული თანმხლები დაავადებები და ჩვენ გავეცით რეკომენდაცია, რომ კლინიკაში ემკურნალა, მაგრამ მან არაფრით ისურვა ეს. რა თქმა უნდა, უმჯობესია კლინიკაში მკურნალობა, სანამდეც აუვა ჩვენი ჯანდაცვის სისტემა ამას, თუმცა შინ მკურნალობა არ არის ასე პირდაპირ საფრთხის შემცველი. ჩვენ შეგვიძლია იმის პროგნოზირება, დამძიმდება თუ არა პერსპექტივაში პაციენტი და თუ ვნახავთ, რომ დამძიმება არ არის მოსალოდნელი, მხოლოდ იმ შემთხვევაში გავცემთ სახლში მკურნალობის რეკომენდაციას.

- რა გაძლევთ იმის პროგნოზის საფუძველს, რომ პაციენტის მდგომარეობა შეიძლება უეცრად არ დამძიმდეს? რამდენად უტყუარია პრაქტიკით ასეთი პროგნოზი?

- 100 % - იანი სიზუსტე მედიცინაში არ არსებობს, თუმცა უმეტეს შემხვევაში ასეთი პროგნოზის შეუმცდარად გაკეთება შესაძლებელია, რადგანაც ამის საფუძველს გვაძლევს ლაბორატორიული კვლევები და კონკრეტული მაჩვენებლები. თუ კორონავირუსს თან ახლავს მძიმე ქრონიკული დაავადება, დიდი შანსია, რომ პაციენტი უეცრად დამძიმდეს, ამიტომ ასეთ შემთხვევაში სახლში მკურნალობის რეკომენდაციას არ გავცემთ. ასევე, სახლში მკურნალობას მოქმედი რეგულაციებით, არ ექვემდებარებიან ბავშვები და 65 წელს გადაცილებული პირები. მაგრამ ჯერ სახლში მკურნალობაზე საუბარი ცოტა მაინც ნაადრევი მგონია. ჯერ ჩვენ ვუმკლავდებით ჰოსპიტალურ მომსახურებას, თუმცა თუ ასე გაგრძლედა, ვირუსის გავრცელება, მაშინ პაციენტებს მოუწევთ შინ მკურნალობა. აქამდე რომ არ მივიდეს საქმე აუცილებელია ისევ და ისევ დავიცვათ რეკომენდაციები. ვატაროთ პირბადე სწორად, ისე რომ ცხვირ-პირი იყოს დაფარული. ვცვალოთ ის ხშირ-ხშირად და დავიცვათ დისტანცია.