ბეირუთის მასშტაბური აფეთქებიდან 30 დღის შემდეგ, ნანგრევებში "სიცოცხლის ნიშნებს" მიაკვლიეს - "შესაძლოა, იქ ვინმე ცოცხალი იყოს"

ბეირუთში მომხდარი შემზარავი აფეთქებიდან ერთი თვე გავიდა და მაშველები ნანგრევებში დაკარგულებს დღემდე ეძებენ. როგორც CNN წერს, სამაშველო სამსახურის წარმომადგენლებმა ნანგრევებში სამაშველო სამუშაოებიდან 30 დღის შემდეგ, "სიცოცხლის ნიშნები“ აღმოაჩინეს.

სპეციალური ტექნოლოგიის საშულებით, ნანგრევებიდან მათ გულისცემის სიგნალი მიიღეს, თუმცა ჯერჯერობით ვერავის მიაკვლიეს.

როგორც CNN წერს, ეს არაა ერთადერთი ადგილი, საიდანაც გულის ცემის სიგნალი მოდიოდა. მაშველთა თქმით, მსგავსი ორი შემთხვევა აქვთ, თუმცა ამ დრომდე ტერიტორიის ნანგრევებისგან გასუფთავებას და ადამიანების პოვნას ვერ ახერხებენ.

მაშველები დარწმუნებულები არიან, რომ იქ ნამდვილად არიან ადამიანები. მათი თქმით, მცირეა იმის შანსი, რომ იქ ვინმე ცოცხალი იყოს და თუმცა, რადგანაც სიგნალი მიიღეს, ამბობენ, რომ გამორიცხული არაფერია.

ცნობისთვის ლიბანში, ბეირუთში აფეთქება 4 აგვისტოს მოხდა. შედეგად 200-ზე მეტი ადამიანი გარდაიცვალა. მსოფლიო ბანკის მონაცემებით, ზარალი 3.8 მილიარდი აშშ-დოლარიდან 4.6 მილიარდ აშშ დოლარამდე მერყეობს.