შუახევში მომხდარ საზარელ ავარიას ქობულეთის სამაშველოს უფროსი, მამუკა ხაბაზი ემსხვერპლა - ტრაგედიის ახალი დეტალები

წუხელ საზარელი ტრაგედია მოხდა ზემო აჭარაში, სოფელ ხაბელაშვილებში. უბედურ შემთხვევას 3 ადამიანი ემსხვერპლა, 2 კი დაშავდა. გარდაცვლილთა შორისაა ქობულეთის სამაშველო სამსახურის უფროსი, მამუკა ხაბაზი და მისი ერთ-ერთი თანამშრომელი. დაშავებულებს სხეულის მრავლობითი დაზიანებები აღენიშნება. მათი მდგომარეობა ამ დროისათვის სტაბილურია.

ავარია მაშინ მოხდა, როდესაც ისინი გომის მთიდან ბრუნდებოდნენ. ავტომობილი გზის სავალი ნაწილიდან მოცურდა და დაახლოებით 100 მეტრის სიმაღლიდან ხევში გადავარდა. დაშავებულები მაშველებმა უსაფრთხო ადგილზე მალევე გადაიყვანეს, რის შემდეგაც სასწრაფო სამედიცინო დახმარების ჯგუფებმა ისინი სამედიცინო დაწესებულებაში მოათავსეს.

შინაგან საქმეთა სამინისტრომ ფაქტზე გამოძიება საქართველოს სსკ-ის 276-ე მუხლით დაიწყო.