"მივეხმარები გამოძიებას და ბევრ ჩვენებას გავასაჯაროებ, ეს არის მწყემსების ჩვენებები, ისინი რადიკალურად ცვლის გამოძიების ვერსიას" - ადვოკატი

გარდაცვლილი პროგრამისტის, თამარ ბაჩალიაშვილის ოჯახის ადვოკატის მიხეილ რამიშვილის განცხადებით, თამარ ბაჩალიაშვილის გარდაცვალების ვერსია - თვითმკვლელობა, გამოძიებას თავიდანვე ჰქონდა შემუშავებული, რადგან ეს ორგანიზებული იყო. ამის შესახებ მან, „პალიტრანიუსის“ ეთერში, გადაცემა „360 გრადუსში“ განაცხადა.

რამიშვილის თქმით, საგამოძიებო უწყებამ თამარ ბაჩალიაშვილის მიერ აბების ყიდვის ვიდეოჩანაწერები გამოაქვეყნა და აპელირება წამლებზე გააკეთა, მაგრამ ყურადღება არ გაამახვილა იმაზე, რომ ის გასახდომ ჩაისაც ყიდულობს, რაც მას კითხვის ნიშნებს და ეჭვებს უჩენს გამოძიების მიმართ.

„გარდაცვალების საბოლოო ვერსია დასაწყისშივე ჰქონდათ, როდესაც 23 ივლისს გამოვიდნენ და თქვეს, რომ აბებია აღმოჩენილი, წერილია აღმოჩენილი და ფსიქოლოგი ჰყავდაო. ანუ ჯერ არ იყო დადგენილი, საერთოდ რა მიზეზით იყო გარდაცვლილი, მკვლელობა იყო ეს თუ თვითმკვლელობა, მაგრამ ვერსია უკვე თავიდანვე ჰქონდათ, რადგან ორგანიზებული იყო. როდესაც ასეთ ინფორმაციას ავრცელებენ და აბებზეა საუბარი, რატომ არ ავრცელებენ ინფორმაციას, რომ აბებთან ერთად გასახდომი ჩაიც შეიძინა თამარმა. აპელირებას აკეთებენ აბების ყიდვაზე და ძალიან გასაკვირია, ნუთუ არ უნდა დაუკვირდნენ, არ უნდა ჩაწვდნენ გასახდომ ჩაის ყიდულობს ეს გოგო. მე კითხვის ნიშანი და ეჭვი მიჩნდება, რომ გადაადგილდებოდა და მიდიოდა მისთვის უცნობ ადგილას, როდესაც წაშლილია ყველანაირი ლოკაცია, ყველანაირი ზარი, ყველანაირი წერილი, სად უნდა წასულიყო, იქნება ვიღაცამ სთხოვა მაინც აქეთკენ მოდიხარ და რაღაც აბები მჭირდება და წამომიღეო. ადამიანი ყიდულობს გასახდომ ჩაის და თუ მართლა თვითმკვლელობას აპირებდა, რისთვის და ვისთვის ყიდულობდა ამ გასახდომ ჩაის“, - განაცხადა რამიშვილმა.

ადვოკატის განცხადებით, საქმეში არსებული მტკიცებულებები, კერძოდ, მწყემსების ჩვენებები რადიკალურად ცვლის გამოძიების მიერ გახმაურებულ თვითმკველობის ვერსიას. როგორც ადვოკატმა აღნიშნა, ის ამ ჩვენებების გასაჯაროებას გეგმავს.

„ჩვენ გამოძიებას და პროკურატურას თავიდანვე ვთხოვდით სატელიტიდან 18-დან 22 ივლისამდე გადაღებული სურათები დადონ და შესაბამისი კოორდინატებიც მივაწოდეთ. იყო თუ არა იქ საერთოდ ავტომობილი. მწყემსები ისეთ ჩვენებებს იძლევიან, ლამის ჩერნობილად აქციეს აღნიშნული საძოვარი. თითქოსდა არასდროს არ ყოფილა იქ ნახირი. ამ დროს 12, 13, 14 აგვისტოს ვიდეოკადრები მაქვს გადაღებული, როგორ გადაადგილდებიან. როგორც ჩანს, პოლიციელები არ იყვნენ იმ დღეს მორიგეობაზე.

მივეხმარები გამოძიებას და ბევრ ჩვენებას, რაც საქმეშია, მეც გავასაჯაროებ, როგორც თვითონ ასაჯაროებენ. ეს ჩვენებები რადიკალურად ცვლის გამოძიების ვერსიას. ეს არის მწყემსების ჩვენებები“, - განაცხადა რამიშვილმა.

პროკურატურის განცხადებაზე, რომ ბაჩალიაშვილის ავტომობილში არსებულ ნივთებზე მხოლოდ გარდაცვლილის დნმ-ია აღმოჩენილი, რამიშვილი ამბობს, რომ „როდესაც ორგანიზებულია მკვლელობა, იქ ყველაფერი ხელთათმანებით ძალიან კარგად იგეგმება, რომ არავისი კვალი არ აღმოჩნდეს“.

ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.