ედუარდ შევარდნაძისა და რეი ჩარლზის ოფიციალური შეხვედრის აქამდე უცნობი კადრები - როგორ ეხუმრა ექსპრეზიდენტი ლეგენდარულ მომღერალს
შეიძლება ბევრმა არ იცის, რომ 90-იან წლებში ლეგენდარული მუსიკოსი, რეი ჩარლზი თბილისს სტუმრობდა. არქივში აღნიშნულის დამადასტურებელი ვიდეომასალაც ინახება.
რეი ჩარლზი ქვეყნის მაშინდელ პირველ პირებსაც შეხვდა, მათ შორის, პრეზიდენტ ედუარდ შევარდნაძეს. "ფეისბუქ" გვერდი The Eduard Shevardnadze Center რეი ჩარლზისა და შევარდნაძის შეხვედრის ამსახველ ვიდეოს აქვეყნებს.
"თქვენ არ გვიცნობთ, მაგრამ ჩვენ გიცნობთ. მე აუცილებლად დავესწრები თქვენს კონცერტს. ზოგიერთი მეუბნება, რა პრეზიდენტი ხარ, ბილეთს ვერ მიშოვიო", - ასე მიმართა შევარდნაძემ რეი ჩარლზს. ასევე მუსიკოსს საქართველოს ისტორიის შესახებ უამბო და უთხრა, რომ ბრძოლების დროს ქართველებს იარაღი ყოველთვის ცოტა ჰქონდათ და მუსიკით იყვნენ შეიარაღებულნი.
"ჩემს მეგობრად გთვლით", - უთხრა რეი ჩარლზმა პრეზიდენტს და მუსიკის მნიშვნელობაზე ისაუბრა.
"მე არ მგონია, რომ სხვა რამეს შეეძლოს ისე გააერთიანოს ხალხი, როგორც მუსიკას. მუსიკა ადამიანების ყველაზე უფრო დიდი გამაერთიანებელია", - თქვა ლეგენდარულმა მუსიკოსმა.