როგორ მოხვდნენ ირმა ინაშვილის ბრიფინგზე იმედა კახიანი, თემურ თათარაშვილი და ზურაბ რთველიაშვილი და მიდიან თუ არა პოლიტიკაში?

"პატრიოტთა ალიანსის" გარშემო სკანდალების სერია არ წყდება. საზოგადოება ჯერ კიდევ ირმა ინაშვილისა და გია ლომიას აფხაზეთში ვიზიტს აფასებდა, როდესაც პარტიის წინასაარჩევნო ბანერებმა აჭარაში საზოგადოების აღშფოთება გამოიწვია. პარტიის ლიდერი ირმა ინაშვილი ამბობს, რომ გიორგი ლომიასთან ერთად მისი ვიზიტი აფხაზეთში კერძო ხასიათს ატარებდა. თუმცა, როგორ მოგვიანებით გახდა ცნობილი, ხატზე, რომელიც აფხაზეთში ჩააბრძანეს, "აფხაზურმა ეკლესიამ" უარი თქვა. საზოგადოების აღშფოთების შემდეგ ინაშვილმა ბრიფინგი გამართა, სადაც ზურგს ბევრი ცნობილი ადამიანი უმშვენებდა. მათ შორის იყვნენ: მსახიობი იმედა კახიანი, პოეტი ზურაბ რთველიაშვილი და მომღერალი თემურ თათარაშვილი.

როგორ მოხვდნენ აღნიშნულ ბრიფინგზე? - ამ კითხვით მივმართეთ ამ ცნობილ ადამიანებს, ასევე ვკითხეთ, რას ფიქრობენ "პატრიოტთა ალიანსის" მიერ წინასაარჩევნოდ აჭარაში გაკრულ ბანერებზე, რომელზეც აჭარა, აფხაზეთთან და ოსეთთან ერთად წითლად იყო შემოხაზული, როგორც ტერიტორია, რომელსაც ვკარგავთ და დაცვა სჭირდება და ხომ არ აპირებენ, „"პატრიოტთა ალიანსთან" ერთად, პოლიტიკაში წასვლას...

იმედა კახიანი, მსახიობი:

- დამირეკეს მაგათი ტელევიზიის, "ობიექტივის" სახელით და მითხრეს, აფხაზეთში ირმას სტუმრობასთან დაკავშირებით გადაცემას ვაკეთებთ და გეპატიჟებით, რა აზრის ხართო. მივედი და ვუთხარი, რომ მომწონს ეს ყველაფერი, რომ აუცილებელია დიალოგი, დალაპარაკება და ნაბიჯის გადადგმა იქით, რომ შერიგება მოხდეს-მეთქი. შემდეგ ვიდეოში გადაღებაზეც დავთანხმდი.

- საზოგადოების მხრიდან ძალიან უარყოფითი გამოხმაურება მოჰყვა "პატრიოტთა ალიანსის" წინასაარჩევნო ბანერებს, მათ ამ ნაბიჯს როგორ შეაფასებდით?

- ბანერები კი, მაგრამ, მე ვნახე ტელევიზიით თურქული გაზეთი, რომელშიც ბათუმი თურქეთის ტერიტორიად იყო მოხსენიებული. ირმა ინაშვილს ვიცნობ, ახლოს არა, მაგრამ საერთოდ მომწონს "პატრიოტთა ალიანსი". შეიძლება რაღაცები ეშლებათ, მაგრამ სამშობლო უყვართ.

რაც შეეხება პოლიტიკაში წასვლას, არ ვაპირებ, 83 წლის ვარ და რაღა დროს ჩემი დეპუტატობაა. ადრე მქონდა ხშირად შემოთავაზება, მაგრამ ვერ გავბედე, რადგან იქ სხვა პროფესიით ადამიანები უნდა იყვნენ, მაგალითად, ისტორიკოსები.

- თქვენი ოჯახის წევრები როგორ შეხვდნენ "პატრიოტთა ალიანსის" ვიდეოში თქვენს გამოჩენას?

- თქვენ რასაც გელაპარაკებით, იგივეს ვეუბნები მათაც. ოჯახში ზოგი ფიქრობს, რომ რუსეთის ნდობა არ შეიძლება. ვმსჯელობთ, იმათ თავისი მოსწონთ, მე ჩემი... პოლიტიკასთან არ ვარ ახლოს, მაგრამ ეს იმას კი არ ნიშნავს, რომ ქვეყანა არ მიყვარს. პირიქით ყველამ უნდა გავაკეთოთ ჩვენი საქმე და ეს არის ქვეყნის სიყვარული.

თემურ თათარაშვილი, მომღერალი:

- ირმა ინაშვილი, იცით, ჩემი რამდენი წლის მეგობარია? - ამით დავამთავროთ საუბარი. ჩემ არჩევანს მარტო საკუთარ თავს ვუთანხმებ, სხვას არავის. არ ვაპირებ პოლიტიკაში მოსვლას. უბრალოდ, გიმეორებთ ირმა ჩემი მეგობარია და მიყვარს ძალიან.

- "პატრიოტთა ალიანსის" სკანდალურ ბანერებზე რა კომენტარს გააკეთებდით?

- არ ვიცი რა მოხდა ამ ბანერებთან დაკავშირებით. ირმა დაკავებულია ამ მაჯლაჯუნების მოგერიებით და ხშირად ვერ ვხვდები. ამიტომ ვერ გეტყვით მაგ თემაზე ვერაფერს. პარტიის ლიდერები გაგცემენ პასუხს.

ზურაბ რთველიაშვილი, პოეტი:

- არ ვიცი, რატომ იწვევს ეს აჟიოტაჟს. მე მაქვს ჩემი ბიოგრაფია და ამ ბიოგრაფიას გადახედოს ყველამ.

- თქვენი ბიოგრაფიიდან გამომდინარე გეკითხებით, როგორ მოხვდით ამ ბრიფინგზე?

- ჩემი აზროვნება, მიდგომები და ბიოგრაფია თავისებურია, არ ვაკეთებ ასეთ რაღაცებზე კომენტარს. საჭორაოდ გახადეს ეს თემა და რაღაცებს ჩხრეკენ, მე ვხვდები ამას ვინ აკეთებს და დაწყნარდნენ. მე მინდა, რომ ეს ქვეყანა იყოს ერთიანი.

- პირადად იცნობთ ირმა ინაშვილს?

- დიახ, ვიცნობ, ეს არ ნიშნავს რომ მე აქეთ ვარ ან იქით, მე ვარ პოეტი ზურაბ რთველიაშვილი

- სკანდალურ ბანერებზეც გკითხავთ...

- არ ვიცი, არ ვერევი, უნდა იყოს წესიერი პოლიტიკური გარემო, სხვა მეთოდები, სხვა ხერხები. მე არ ვაპირებ პოლიტიკაში წასვლას, ყველას ჯგუფს, პოლიტიკოსს, ვისაც კარგის გაკეთება შეუძლიათ ამ ქვეყნისთვის, მოვუწოდებ ერთიანობისკენ, მინუს ერთი იმ ძალისგან, რომლებმაც კარგად გვანახეს უკვე თავისი სახე.

- "ნაციონალურ მოძრაობას" გულისხმობთ?

- დიახ, და მასთან არსებულ ისეთ ტიპებს, რომლებიც იქ იყვნენ, სადაც არ იყო ქართული რეალობა და 25 პროცენტი რუს ოკუპანტებს ჩააბარეს.

ვფიქრობ, რომ ბევრი ახალი სახე უნდა იყოს პოლიტიკაში. ახალგაზრდებს უნდა მივცეთ საშუალება პოლიტიკაში ჩართვის. ისეთ ერს მინდა ვხედავდე, რომელიც პროგრესული მსოფლიოს გვერდით დგას.