"არცერთს დაგვირეკავს ლასოსთვის, ის იმ დროს ჩვენთან იყო... კონფლიქტის დაწყებისთანავე დავრეკეთ 112-ში" - რას ჰყვება გოგო, რომელიც რაჭაში მოკლულის მდგმური იყო

22 აგვისტოს, გამთენიისას, ამბროლაურის სოფელ აგარაში შემზარავი დანაშაული მოხდა. 29 წლის ვლას (ლასო) აბუთიძე, ღამის 2 საკუთარი სოფელში მოკლეს.

მაშინ გავრცელდა ინფორმაცია, რომ ახალგაზრდა ბიჭს კოტეჯი ჰქონდა, რომელიც გოგონებზე გააქირავა. ადგილობრივები ჰყვებოდნენ, რომ ლასოს ღამით მდგმურებმა დაურეკეს და უთხრეს, რომ იქვე გვერდით, სახლის მშენებლობაზე დასაქმებული მუშები ავიწროებდნენ, რის შემდეგ საქმის გასარკვევად ახალგაზრდა მამაკაცი ადგილზე მივიდა. მათ შორის შელაპარაკება მოხდა, რასაც მკვლელობა მოჰყვა.

მას შემდეგ სოციალურ ქსელში ფაქტს უამრავი ადამიანი ეხმაურება, ბევრი მათგანი წერს, რომ მდგმურებს არა კოტეჯის მეპატრონესთან, არამედ პოლიციაში უნდა დაერეკათ.

ერთ-ერთი მათგანი, რომელიც იმ დროს აბუთიძის კოტეჯში იმყოფებოდა მანანა ავსაჯანიშვილია, რომელმაც ცოტა ხნის წინ "ფეისბუქზე" პოსტი გამოაქვეყნდა და მკვლელობის დღე გაიხსენა:

"ვიზიარებ ლასო აბუთიძის ოჯახის და ახლობლების მწუხარებას! საშინელი ტრგედია დატრიალდა, ჩემთვის და ჩემი მეგობრებისთვის მთელი დარჩენილი ცხოვრება ეს იქნება უდიდესი და გაუნელებელი ტკივილი. განხილვის საგანი გახდა ფაქტი, რომ თითქოსდა კოტეჯის დამსვენებელმა გოგონებმა დასახმარებლად კოტეჯის მესაკუთრეს დაურეკეს.

მე ვარ ერთ-ერთი იმ გოგოთაგანი და ამდენი დეზინფორმაციის და ბულინგის შემდეგ ამ პოსტს ვწერ მათთვის, ვისაც სიმართლე აინტერესებს! ეს იყო ჩვენთვის, ოთხივესთვის ცხოვრებაში ყველაზე ტრაგიკული დღე!

არ გვისაუბრია იმიტომ, რომ ვგლოვობთ, იმიტომ რომ ამ უმძიმესმა ტრაგადიამ გაგვანადგურა და ეხლაც ძლივს ვუყრი სათქმელს თავს, კიდევ უფრო მეტ ლანძღვას ავიტანდით საზოგადოებისგან, ოღონდ ის ადამიანი ცოცხალი იყოს...

სიმართლე კი მდგომარეობს შემდეგში: არცერთ ჩვენგანს არ დაგვირეკავს დასახმარებლად კოტეჯის მესაკუთრისთვის. იმ უბედური წუთების დროს, ლასო აბუთიძე ჩვენთან იმყოფებოდა, რადგან ტელევიზორის სადენი ამოიტანა, რომელიც ერთი საათის წინ წაიღო. თავდამსხმელები უკვე წასულები მობრუნდნენ უკან და დაუძახეს ლასოს გარეთ...

დაიწყო კონფლიკტი. კონფლიქტის დაწყებისთანავე ოთხივე ჩვენგანი მაქსიმალურად ვცდილობდით გვემოქმედა უსწრაფესად, ჩემმა დამ 112-ში დარეკა კონფლიქტის დაწყებისთანავე. მედეა ცირამუამ ხელჩართული ჩხუბის დროს შებოჭილი ლასოს თავდამსხმელებისგან დაცვა ფიზიკურად სცადა, რის გამოც ერთ-ერთმა მკვლელმა სცემა და თმებით ითრია, მთელი კონფლიქტის განმავლობაში ვყვიროდით, ვკიოდით და შველას ვითხოვდით, თუმცა უშედეგოდ...

მშველელი არსაიდან ჩანდა, გვემუქრებოდნენ და ფიზიკურად გვერჩოდნენ ჩვენც, პირადად მე ბოლოს მეზობელ სახლში შევვარდი და იმ მყოფ მამაკაცებს ვთხოვე დახმარება.... მათი დახმარებით შევძელით ლასოს მკვლელებისგან გამოგლეჯა...

სასწრაფო სამედიცინო დახმარების მოსვლამდე ჩვენი ძალებით მისი სიცოცხლის შენარჩუნებას ვცდილობდით.არავის, საერთოდ არავის ვუსურვებ იმავეს გამოვლას! ვერცერთი სიტყვა ვერ აღწერს იმ წუთების სიმძიმეს! ბოლო წუთამდე გვჯეროდა, რომ გადარჩებოდა! საშინელებაა იმაზე ფიქრი, რომ ეს სრულიად უდანაშაულო ბიჭი აღარ არის! ვიზიარებ ოჯახის უმძიმეს ტრგედიას და მწუხარებას!" - წერს ავსაჯანიშვილი.