საცობი ბათუმის შესასვლელთან და დატბორილი ქუჩები - რა ხდება ქალაქში (ფოტოები სოციალური ქსელიდან)

ბათუმში დილიდან გადაუღებლად წვიმს რის გამოც ქალაქის ზოგიერთი ქუჩა დაიტბორა და წყალი საცხოვრებელ სახლებშიც შევარდა. "ბათუმის წყალში" აცხადებენ, რომ მსგავსი სტიქია ბოლო პერიოდის განმავლობაში არ ყოფილა.

"სამუშაოები ამ წუთებშიც გრძელდება. სანიაღვრე წყლების შეუფერხებლად გადინების მიზნით ზღვაში გამსვლელი არხები ინტენსიურად იწმინდება.

ბათუმში მსგავსი სტიქია ბოლო პერიოდის განმავლობაში არ დაფიქსირებულა. ამ ეტაპზე ბათუმი-მახინჯაურის დამაკავშირებელ ცენტრალურ გზაზე საავტომობილო მოძრაობა ცალმხრივად აღდგენილია. ადგილზე თითქმის ყველა სამსახური საგანგებო რეჟიმში აგრძელებს მუშაობას, რათა წვიმის შედეგად გამოწვეული პრობლემები მაქსიმალურად სწრაფად აღმოიფხვრას“, - ნათქვამია "ბათუმის წყლის" მიერ გავრცელებულ ინფორმაციაში.

• გაეცანით: როდის გამოიდარებს საქართველოში - ამინდის პროგნოზი

საცობია ბათუმი-მახინჯაურის დამაკავშირებელ გზაზე.

ბათუმში, ჩაქვის მხრიდან შემოსასვლელ გზაზე მსუბუქი ავტომობილების გადაადგილება შეუფერხებლად ხორციელდება. ამის შესახებ „ინტერპრესნიუსს“ აჭარის მთავრობიდან აცნობეს.

რაც შეეხება გასასვლელ გზას, უკვე დაიწყო ეტაპობრივად ტრანსპორტის გადაადგილება.

ადგილზე იმყოფებოდა აჭარის მთავრობის თავმჯდომარე თორნიკე რიჟვაძე და ბათუმის მერის მოვალეობის შემსრულებელი არჩილ ჩიქოვანი. მუშაობა საგანგებო რეჟიმში გრძელდება.

შექმნილი მდგომარეობის ამსახველ ფოტოებს მოაქალაქეები "ფეისბუქზე" ავრცელებენ.

.