"სიკვდილის წინ დავწერ წერილს და ყველაფერს მოვყვები" - რას უკავშირებს ენზელ მკოიანი ძმის მანქანის აფეთქებას და რატომ საყვედურობს პროკურატურას

"ქართული ოცნების” დეპუტატ ენზელ მკოიანის ძმას ახალქალაქში თავს დაესხნენ. შემთხვევის ადგილზე ექსპერტ-კრიმინალისტები მუშაობენ.

როგორც დეპუტატი ამბობს, მის ძმას ჩაუსაფრდნენ და ავტომანქანის აფეთქება სცადეს. ენზელ მკოიანის თქმით, ეს არის აღსრულება იმ მუქარას, რომელიც ბოლო პერიოდში მისი მისამართით ისმის.

მისი ინფორმაციით, ტელეფონით უკავშირდებოდნენ და მისი ოჯახის წევრების მოსპობით ემუქრებოდნენ. ენზელ მკოიანის ძმის ავტომანქანა დისტანციური მოწყობილობით ააფეთქეს.

AMBEBI.GE ენზელ მკოიანს დაუკავშირდა:

"დაახლოებით ერთი თვის წინ მემუქრებოდნენ. ამის შესახებ ვაცნობე პროკურატურას, ირაკლი შოთაძეს, რომ მაშანტაჟებდნენ და ფულსაც მთხოვდნენ. მათ კი საქმე რეგიონურ პოლიციას გადაუგზავნა გამოსაძიებლად.

მოკვლით მემუქრებოდნენ. იმის გამო, რომ გამოძიება არ იყო ეფექტური, სწორედ ამიტომაც მოხდა ეს ამბავი. იქნებ ამ საქმით მაინც დაინტერესდეს პროკურატურა და დაადგინოს, ვინ არიან ეს პირები, ვინც მემუქრებიან.

ავტომობილს ორმაგი დამცავი მინა ჰქონდა, მინები ჩაიმსხვრა და ჩემი ძმა გადარჩა. მან დამირეკა და მერე მივედი ადგილზე. მანქანით, რომლითაც ჩემი ძმა მგზავრობდა, მე დავდიოდი და მკვლელებს მე ვეგონე, ჩემი აფეთქება უნდოდათ. ძალიან ძლიერი აფეთქება იყო. ვხვდები, ვინ არიან ეს ადამიანები, თუ ასე გაგრძელდა, სიკვდილის წინ დავწერ წერილს და იქ ყველაფერს მოვყვები. ეს უკვე მესამე შემთხვევაა" - ამბობს ჩვენთან საუბარში ენზელ მკოიანი.