როგორ ხედავენ ადამიანები თვალის სხვადასხვა დაავადების დროს და როგორ ვუმკურნალოთ მათ

თვალის დაავადებები მსოფლიოში ძალიან გავრცელებული და ამავდროულად, ძალიან გახშირებულია. სხვა არაერთ ფაქტორთან ერთად, ცხოვრების სტილის შეცვლა, დახურულ სივრცეში უფრო ხანგრძლივი ყოფნა და ეკრანის წინ გატარებული მეტი დრო განაპირობებს იმას, რომ უფრო მეტ ადამიანს აქვს მხედველობასთან დაკავშირებული სხვადასხვა ტიპის პრობლემა.

თვალის პრობლემებისა და დისკომფორტის პირველივე ნიშნების დაფიქსირების დროს აუცილებელია, რომ მიმართოთ ოფთალმოლოგს. თვალის სხვადასხვა დაავადებაზე „ოფთალმოლოგიის ეროვნული ცენტრის“ ექიმი ოფთალმოლოგი, ოფთალმოქირურგი გრიგოლ ქამუშაძე გვესაუბრება. აქვე კი წარმოგიდგენთ ფოტოებს, რომელიც დაგანახებთ, თუ როგორ ხედავს ადამიანი სხვადასხვა ოფთალმოლოგიური დაავადების დროს.

კატარაქტა

კატარაქტა არის თვალში არსებული ბუნებრივი ბროლის სრული ან ნაწილობრივი შემღვრევა. უმეტეს შემთხვევაში კატარაქტა გვხვდება ასაკობრივი, იშვიათად - მეტაბოლური, ტრავმული.

კატარაქტის დროს პაციენტს აქვს ისეთი მხედველობითი დისკომფორტები, როგორიცაა ბურუსში მხედველობა, გაორება, მზეზე გამოსვლის დისკომფორტი. ეს ყველაფერი შეიძლება დაკავშირებული იყოს სხვადასხა ტიპის ტრავმებთან.

ამ დაავადების მკურნალობა დღესდღეობით მხოლოდ ქირურგიულია. სხვა ტიპის კონსერვატიული მკურნალობა კატარაქტის შემთხვევაში არ არსებობს. თუმცა საკმაოდ მარტივი, ამბულატორიული ქირურგიული ჩარევა ხდება. წარმატებული ოპერაცია 5-7 წთ გრძელდება. ოპერაციის არსი მდგომარეობს იმაში, რომ ხდება ბუნებრივი შემღვრეული ბროლის ამოღება და მისი ხელოვნური სინთეზური ბროლით ჩანაცვლება. ჩარევა ადგილობრივი გაუტკივარებით, თვალის წვეთების საშუალებით ხდება. ოპერაციის შემდეგ პაციენტი 5 წუთში ტოვებს კლინიკას და სახლში იწყებს მკურნალობას. მხედველობითი რეაბილიტაციის პროცესი იწყება 6-12 საათის შემდეგ. სრული მხედველობის დაბრუნების პერიოდი დამოკიდებულია კატარაქტის სიმძიმესა და ოპერაციული ჩარევის სირთულეზე. მაქსიმალური ვადა არის 10 დღე. ამ პერიოდის შემდეგ კი პაციენტი სრულად, 100%-ით იბრუნებს კატარაქტით გამოწვეულ დაკარგულ მხედველობას.

ოპერაციის შემდეგ მხედველობის კვლავ დაკარგვის შანსი არსებობს მხოლოდ იმ შემთხვევაში, თუ პაციენტს სხვა თანმხლები დაავადება აქვს და პროგრესირებს. მაგალითად, შაქრიანი დიაბეტი, ბადურის ასაკობრივი დეგენერაცია და ა.შ..

გრიგოლ ქამუშაძის მიერ ჩატარებული კატარაქტის ოპერაცია გულისხმობს უკანა კაფსულის მოცილებასაც, რაც გამორიცხავს მეორადი კატარაქტის განვითარების რისკს. ამ ტიპის დამატებითი ჩარევა საჭიროებს ქირურგის დიდ გამოცდილებას და მაღალ პროფესიონალიზმს.

გლაუკომა

გლაუკომა გახლავთ დაავადება, როდესაც ხდება თვალის შიდა წნევის მატება და შედეგად მხედველობის ნერვის დაზიანება. მხედველობის ნერვში გადის 1 200 000 ნერვული ბოჭკო. ყოველდღიურად კი, როდესაც პაციენტს მაღალი წნევა აქვს, ხდება ამ ნერვების მექანიკური და იშემიური დაზიანება და ნერვული ქსოვილის კვდომა. შედეგად ადამიანი კარგავს მხედველობას და ეს არის მხედველობის შეუქცევადი დაკარგვა. სწორედ ამიტომაც გლაუკომა გახლავთ ძალიან სახიფათო დაავადებაა და მას მხედველობის ქურდს უწოდებენ.

გლაუკომის სიმპტომებია: ბურუსი, სხივის გაბნევა, როდესაც პაციენტი უყურებს ნათურას, მის გარშემო კიდევ მრგვალი რკალები ჩნდება. ძლიერი შეტევის შემთხვევაში მას აქვს ძლიერი, გაუსაძლისი ტკივილი თავის არეში, რომელსაც შეიძლება თან ახლდეს ღებინებაც კი. სერიოზული მხედველობითი დისკომფორტების დაწყების დროს პაციენტს უკვე მხედველობის 70%-75% დაკარგული აქვს. ამიტომ ნებისმიერი ტიპის ჩივილის დაფიქსირების დროს, აუცილებელია ოფთალმოლოგის კონსულტაცია.

გლაუკომის მკურნალობა ანუ თვალის შიდა წნევის რეგულაცია შეიძლება გავყოთ ორ ნაწილად. პირველ ეტაპზე ვიწყებთ კონსერვატიულ მკურნალობას ანტიგლაუკომატოზური წვეთებით. წნევა უნდა იყოს 8-დან 21-მდე. თუ პაციენტი იღებს წვეთების მაღალ რაოდენობას და წნევა მაინც 21-ია, მაშინ საჭიროა ქირურგიული ჩარევა. ქირურგიულ ჩარევას ვთავაზობთ იმ პაციენტებსაც, რომელთაც ანტიგლაუკომატოზური წვეთების ფონზე თვალშიდა წნევა ნორმაში აქვთ, მაგრამ გარკვეული მიზეზების გამო თვალის წვეთების რეგულარულ მოხმარებას ვერ ახერხებენ. აღნიშნული წვეთების მოხმარება საჭიროა რეგულარულად და მთელი ცხოვრების მანძილზე.

გლაუკომის ოპერაცია კატარაქტისგან განსხვავებით გამოირჩევა ინტრაოპერაციული და პოსტოპერაციული გართულების მაღალი რისკებით. ოპერაციის შემდეგ წნევა სტაბილურდება 8-დან 15-მდე. პოსტოპერაციული მკურნალობა გრძელდება 2 კვირიდან 1 თვემდე.

ასტიგმატიზმი

ეს არის თვალის ოპტიკური ნაწილის რქოვანას და უფრო იშვიათად, ბროლის ზედაპირის არათანაბარი სიმეტრიით გამოწვეული პათოლოგია. ზოგადად, თვალს აქვს ორი ნაწილი, ოპტიკური ნაწილი და ნერვული ნაწილი, ოპტიკური ნაწილი არის რქოვანა და ბროლი, რომელიც პასუხისმგებელია ზუსტად გაატაროს გამოსახულება და სრული გამოსახულება ბადურაზე შეკრიბოს ერთ წერტილში. მას უნდა ჰქონდეს სრული სიმეტრიული სფერული ფორმა, რომ თითოეული წერტილიდან შემავალი სხივი და გამოსახულება ზუსტად ერთ წერტილში მოხვდეს. ასტიგმატიზმი კი არის სწორედ ის მდგომარეობა, როდესაც რქოვანა დახრილია ზევით, ქვევით, მარცხნივ ან მარჯვნივ. შესაბამისად, ამ ადგილიდან შემავალი სხივი სწორი მიმართულებით ვეღარ მიდის ცენტრისკენ. ამიტომაც პაციენტს გამოსახულება აქვს არამკაფიო და ბუნდოვანი. ახლო და შორსმხედველობისგან განსხვავებით, ასეთი ადამიანი ვერც შორს ხედავს, ვერც ახლოს და ვერც საშუალო მანძილზე.

ასტიგმატიზმი არის თანდაყოლილი პათოლოგია. თუმცა შეიძლება იყოს ტრავმული ან შეძენილი. თუ ასტიგმატიზმი მატულობს, ეს უკვე საგანგაშოა. ამ დროს ეჭვი ჩნდება რქოვანას ისეთ პათოლოგიაზე როგორიც არის რქოვანას პროგრესირებადი გათხელება (კერატოკონუსი). ამიტომაც პაციენტი აუცილებლად უნდა იყოს ოფთალმოლოგის მეთვალყურეობის ქვეშ.

ასტიგმატიზმის მკურნალობა შესაძლებელია ლაზერული კორექციის საფუძველზე.

შორსმხედველობა და ახლომხედველობა

შორსმხედველობა და ახლომხედველობა გამოწვეულია ადამიანის თვალის სიგრძით. თვალის სიგრძეში იგულისხმება რქოვანი ზედაპირიდან ანუ თვალის წინა ნაწილიდან ბადურის ზედა კიდემდე სიგრძე, რომელიც უნდა იყოს 23 მმ. თუ თვალი ერთი მმ-ით გრძელია, მაშინ პაციენტს აქვს მინუს სამი. თუ ერთ მმ-ით მოკლეა, მაშინ აქვს პლიუს სამი. სწორედ ეს ფაქტორი განსაზღვრავს შორსმხედველობასა და ახლომხედველობას.

ასტიგმატიზმის მსგავსად, აღნიშნულიც არის თვალის რეფრაქციული დაავადება, რომლის მკურნალობაც ხდება ლაზერული კორექციით. თუმცა არსებობს შემთხვევები როდესაც ლაზერული კორექცია ვერ პასუხობს იმ გამოწვევებს, რომელიც პაციენტს აქვს. ამ შემთხვევაში სხვა ქირურგიულ მეთოდებს მივმართავთ. ჩვენ შეგვიძლია კორექცია გავუკეთოთ ნებისმიერი ტიპის, სირთულის რეფრაქციული ანომალიას (შორსმხედველობა, ახლომხედველობა, ასტიგმატიზმი). პირველ ეტაპზე კი ყოველთვის განვიხილავთ ლაზერულ კორექციას, რადგან ის არის ყველაზე დამზოგველი, ხელმისაწვდომი და ხანმოკლე რეაბილიტაციის მქონე ჩარევა.

ახლომხედველობის ოპერაცია 18 წლის ასაკიდან შეგვიძლია გავაკეთოთ, თუ ეს პროცესი პროგრესირებადი არ არის. იმ შემთხვევაში თუ მატულობს ახლომხედველობა, მაშინ მოცდაა საჭირო. შორსმხედველობის განკურნება უფრო ადრე 15-16 წლის ასაკშიც შესაძლებელია, ისევე როგორც ასტიგმატიზმის.

დღესდღეობით საკმაოდ აქტუალური თემაა საკითხავი სათვალის მოხსნა. ამ ტიპის პროცედურა საკმაოდ ხელმისაწვდომია და საჭიროებს მხოლოდ რამდენიმე წამს. ასაკი 45 დან 65 წლამდე, თუ პაციენტს არ აქვს თვალის რაიმე თანმხლები დაავადება, როგორც არის: კატარაქტა, დიაბეტური რეტინოპათია, ბადურაზე არსებული ასაკობრივი ცვლილებები.

თუმცა თითოეულ ზემოთ აღნიშნულ შემთხვევაში სასურველი შედეგის მისაღებად საჭიროა, რომ ბავშვმა 12 წლამდე შესაბამისი სათვალე ატაროს.ზოგადად, მხედველობის ცენტრების ჩამოყალიბება ხდება დაბადებიდან 12 წლამდე, ამიტომ ბავშვმა სამკურნალო დანიშნულებით სათვალე უნდა ატაროს 12 წლამდე. რიგ შემთხვევაში სათვალის ტარება აუცილებელია ჯანმრთელი თვალის ახვევასთან კომბინაციაში. ტერმინი ზარმაცი თვალი არ ნიშნავს თვალის პათოლოგიას ან სისუსტეს. ეს ტერმინი ნიშნავს მხედველობის ცენტრის სისუსტეს. სწორედ მხედველობის ცენტრებს ვავითარებთ 12 წლამდე სხვადასხვა გზით და თუ მხედველობის ცენტრი განვითარებულია, მხოლოდ ამ შემთხვევაში ვიღებთ ლაზერული კორექციის შედეგად 100%-იან შედეგს. თუ მხედველობის ცენტრი არ არის შესაბამისად განვითარებული, ლაზერული კორექციით მაქსიმალურ შედეგს ვერ მივიღებთ.

კონსულტაციაზე ჩასაწერად დაუკავშირდით "ნიუ ჰოსპიტალსს" - 2 190 190