კორონავირუსის 14 ახალი შემთხვევიდან 12 სოფელ ლენჯერში დაფიქსირდა - რას ამბობენ ექიმები ეპიდვითარებასა და ახალ ინფიცირებულებზე

დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილის პაატა იმნაძის განცხადებით, დღეისთვის ყაზბეგში, პოლიციაში კორონავირუსის 7 დადასტურებული შემთხვევაა. მისივე თქმით, დაავადებათა კონტროლის ცენტრის ერთი ჯგუფი სწორედ ყაზბეგშია წასული და მიმდინარეობს ყველა კონტაქტის გამოკვლევა.

„ჩვენი ერთი ჯგუფი კიდევ წასულია ყაზბეგის რაიონში. ინფიცირებულთაგან 3 არის ადგილობრივი. საბედნიეროდ, იქ ბევრი კონტაქტები მათ არ აქვთ, თავიანთ ოჯახებშიც ბევრი კონტაქტები არ არის, მაგრამ მიმდინარეობს ყველა კონტაქტის გამოკვლევა და დღეს ჩამოვა იქიდან გამოკვლევისათვის აღებული ნაცხები. სულ არის დღეისათვის ყაზბეგში პოლიციაში დადასტურებული 7 შემთხვევა“, - განაცხადა პაატა იმნაძემ.

გარდა ამისა, იმნაძის განცხადებით, ლენჯერის თემში კორტონავირუსით ინფიცირების 12 ახალი შემთხვევა დადასტურდა. როგორც იმნაძემ მთავრობის ადმინისტრაციაში გამართულ ბრიფინგზე განაცხადა, ლენჯერში დაფიქსირებულ შემთხვევებთან კავშირში მყოფი და უშუალოდ ლენჯერში დადასტურებულია მთლიანობაში 30 შემთხვევა.

„აქედან 5 დადასტურდა უკვე თბილისში მყოფ ოჯახის წევრებში, ნათესავებში. დანარჩენი არის თვითონ სვანეთში დადასტურებული. 400-ზე მეტი ტესტი იქნა ჩატარებული გუშინ და იქიდან დღეს 12 ახალი დადასტურებული შემთხვევაა.

გუშინ აღებული ტესტებიდან 600-მდე ჩასულია ქუთაისში და დაწყებულია ანალიზები, 400-ზე მეტი ტესტი ჩატანილია ზუგდიდში და დაწყებულია ანალიზი. ჯამში გუშინ 1000-ზე მეტი ადამიანის გამოკვლევა მოხდა. გამოკვლევები დღესაც მიმდინარეობს. გუშინ 4 სოფელში იყო, დღეს კიდევ გაფართოვდება არეალი გამოკვლევების, მესტიის რაიონში“, - განაცხადა იმნაძემ.

იმნაძის განცხადებით, თუ ქვეყნის რამდენიმე წერტილში კორონავირუსის ინფექციის რამდენიმე კერა გაჩნდება, დაავადების შეკავება შეუძლებელი გახდება. როგორც მან დღევანდელ ბრიფინგზე განმარტა, არცერთი რესურსი არ ეყოფა იმას, რომ ცალ-ცალკე მუნიციპალიტეტებში კვლევები ჩატარდეს.

პაატა იმნაძე კიდევ ერთხელ მოუწოდებს მოსახლეობას, რომ სპეციალისტების მიერ გაცემული რეკომენდაციები აუცილებლად დაიცვან.

„ის ღონისძიებები, რაც მესტიის მუნიციპალიტეტში გატარდა, ძალიან ოპერატიული და მნიშვნელოვანი იყო იმისთვის, რომ ვირუსის შეკავება მაქსიმალურად მომხდარიყო, მაგრამ მინდა ყველამ კარგად იცოდეს, თუ ასეთი კერა ქვეყნის რამდენიმე წერტილში გაჩნდება, დაავადების შეკავება შეუძლებელი გახდება, რადგან არცერთი რესურსი იმას არ ეყოფა, რომ ცალ-ცალკე მუნიციპალიტეტებში ასეთი კვლევები მიმდინარეობდეს.

საბედნიეროდ, ყაზებეგში არ ჩანს ჯერჯერობით ის, რომ ასეთი მდგომარეობა შეიქმნება, იქ ვითარება გაცილებით უფრო კონტროლირებადია, რასაც ჯერ ვერ ვიტყვი მესტიაზე, იმიტომ, რომ 1000 სინჯი, რომელიც გუშინ აიღეს, რეალურად გვაჩვენებს, თუ რა სიტუაციაა მესტიის მუნიციპალიტეტში. კიდევ ერთხელ ვიმეორებ, თუ თითოეული ჩვენთაგანი, ყველგან საქართველოში, განსაკუთრებით ეს ეხება საკურორტო ზონებს, შავი ზღვისპირეთს, კახეთშიც უამრავი ადამიანია დასასვენებლად წასული, თუ არ დავიცავთ ელემენტარულ წესებს, თუ არ გვექნება ყველას დახურულ სივრცეში ნიღაბი, თუ არ დავიცავთ დისტანციას, დამერწმუნეთ, ის, რაც დღემდე მოვიდა, სამწუხაროდ, ქვეყანაში ასეთი სიტუაცია აღარ იქნება. შეიძლება ისეთივე ვითარება იყოს, რაც კარგად იცით, თუ რა ხდება ჩვენს მეზობელ ქვეყნებში. ამიტომ, განსაკუთრებით მოვუწოდებ მათ, ვისი ბიზნესებიც ახლა მუშაობს, ეს არის სასტუმროები, რესტორნები, მაქსიმალურად ყველამ დაიცვას ყველა წესი თავის კლიენტებთან ურთიერთობაში და მოსთხოვონ თავიანთ კლიენტებს, დაიცვან ყველა წესი. ამაზე იქნება დამოკიდებული, თუ რა სიტუაცია იქნება ქვეყანაში. თუ გვინდა, რომ ასე მშვიდობიანად, ნელ-ნელა გავიდეთ ფონს და აცივებამდე არ დაგვემაროს ინფექციის ფართოდ გავრცელება, საჭირო იქნება თითოეულ თქვენთაგანის ჩართულობა ამ პროცესში, რომ თითოეულმა ჩვენთაგანმა დაიცვას ყველა წესი. არაფერი არ არის მძიმედ შესასრულებელი: ეს არის ის, რომ ნიღაბი უნდა ვატაროთ დახურულ სივრცეში და ღიაში, სადაც დისტანციას ვერ ვიცავთ, მაქსიმალურად დავიცვათ დისტანცია, ხელების დაბანა არასდროს გვაწყენს“, - განაცხადა იმნაძემ.

თბილისის ინფექციური საავადმყოფოს კლინიკური დირექტორის, მარინა ეზუგბაიას განცხადებით, კორონავირუსის 14 ახალი დადასტურებული შემთხვევიდან, 12 პაციენტის ინფიცირების წყარო ლენჯერია, 1 პაციენტის წყარო გაჩიანია, 1 კი იმპორტირებული შემთხვევაა.

როგორც მარინა ეზუგბაიამ განმარტა, დღეს კოვიდცენტრებში კორონავირუსით ინფიცირებული სულ 203 პაციენტი მკურნალობს, საიდანაც 7 პაციენტის მდგომარეობა კრიტიკულია, 16 პაციენტის მგომარეობა კი მძიმეა.

„დღეს ქვეყანაში არის 14 ახალი დადასტურებული შემთხვევა და სულ გვაქვს 1278 შემთხვევა. 14 ახალი შემთხვევიდან, 1 პაციენტის წყარო არის გაჩიანი, 12 პაციენტის წყარო არის ლენჯერი და 1 პაციენტი არის იმპორტირებული შემთხვევა. გამოჯანმრთელებულებიდან მხოლოდ 4 დაგვემატა და გახდა 1058. ამ მონაცემებით 82% არის გამოჯანმრთელებულების პროცენტული მაჩვენებელი, ხოლო დადასტურებულსა და გამოჯანმრთელებულს შორის მონაცემების შეფარდებით უკვე 203 პაციენტი მკურნალობს დღეს კოვიდცენტრებში. ამ 203 პაციენტში 7 პაციენტი კვლავ კრიტიკულია. გუშინ იყო 8 და ერთი შედარებით დასტაბილურდა და მძიმეთა სიაში გადავიდა. დღევანდელი მონაცემებით მძიმეთა სიაში 16 პაციენტი გვყავს.

რაც შეეხება ჩვენი ცენტრის მონაცემებს, ჩვენ გუშინ გვყავდა 36 დადასტურებული შემთხვევა, დაგვემატა 6 პაციენტი, გამოჯანმრთელდა 1 და დღეს გვყავს 38 დადასტურებული შემთხვევა“, - განაცხადა მარინა ეზუგბაიამ.

მისივე თქმით, თბილისის ინფექციურ საავადმყოფოშია შსს-ს 3 თანამშრომელი. "მათი მდგომარეობა სტაბილურია, არსად პროგრესირება არ შეინიშნება და მძიმე პაციენტების სიაში არ მოიაზრება არცერთი", - აღნიშნა ეზუგბაიამ.