"ბუსა ჟვანიამ კლინიკას სხვა სახელი და გვარი იმის გამო უთხრა, რომ დედამისს არ ენერვიულა" - ადვოკატი

ყოფილი პრემიერ-მინისტრის, ზურაბ ჟვანიას შვილის, ბესარიონ (ბუსა) ჟვანიას ადვოკატის ირმა ჭკადუას თქმით, ბესარიონ ჟვანია დუმილის უფლებით სარგებლობს.

მისი განცხადებითვე, ბესარიონ ჟვანიას ცივი იარაღით მიყენებული ჭრილობები აღენიშნება, რასთან დაკავშირებითაც, პროკურატურას საკუთარ შუამდგომლობაში არ უსაუბრია.

ჭკადუას განცხადებით, ბესარიონ ჟვანიამ კლინიკას სხვა სახელი და გვარი იმის გამო უთხრა, რომ დედამისს არ ენერვიულა.

ცნობისთვის, ბესარიონ (ბუსა) ჟვანიას, რომელიც ბიზნესმენ გოგი თოფაძის შვილიშვილის, ლევან თოფაძის განზრახ მკვლელობის მცდელობის ბრალდებით დააკავეს, აღკვეთის ღონისძიების სახით პატიმრობა შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლე ეკატერინე კუკულაშვილმა მიიღო.

დღევანდელ სასამართლო სხდომაზე ბრალდების მხარე ბუსა ჟვანიასთვის აღკვეთის ღონისძიების სახით პატიმრობის გამოყენებას, დაცვის მხარე კი მისი 50 000-ლარიანი გირაოს სანაცვლოდ გათავისუფლებას ითხოვდა.