ახალი დეტალები ლევან თოფაძის დაჭრის საქმეზე - რა სკანდალურ ინციდენტთან იყო დაკავშირებული თოფაძის დაჭრაში ბრალდებული ბუსა ჟვანია წლების წინ

ბიზნესმენ გოგი თოფაძის შვილიშვილის, ლევან თოფაძის დაჭრის საქმეზე სამართალდამცველებმა ერთი პირი დააკავეს. არსებული ინფორმაციით, დაკავებული გარდაცვლილი ექსპრემიერ-მინისტრის, ზურაბ ჟვანიას ვაჟი, ბუსა ჟვანიაა.

შინაგან საქმეთა სამინისტროს ინფორმაციით, 1996 წელს დაბადებული ბ.ჟ. ჯანმრთელობის განზრახ მძიმე დაზიანების ბრალდებით, თბილისში დააკავეს. დანაშაული 3-დან 6 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ ბრალდებულმა მიმდინარე წლის 2 აგვისტოს, ურთიერთშელაპარაკების ნიადაგზე, 1998 წელს დაბადებულ ლ.თ.-ს, მისსავე საკუთარ საცხოვრებელ სახლში, ცივი იარაღით სხეულზე რამდენიმე ჭრილობა მიაყენა. დაჭრილი მამაკაცი საავადმყოფოში გადაიყვანეს, სადაც ოპერაცია ჩაუტარდა.

თოფაძეების ოჯახის ადვოკატის გიორგი ანთაძის განცხადებით, ლევან თოფაძეს ჭრილობები ცივი იარაღით აქვს მიყენებული, მას ოპერაცია ჩაუტარდა და ამ ეტაპზე მისი ჯანმრთელობის მდგომარეობა სტაბილურია.

როგორც ადვოკატმა ჟურნალისტებს განუცხადა, მათთვის დაჭრის მოტივი უცნობია. გოგი თოფაძის თქმით, შემთხვევა დილით მოხდა.

"დილის 5:00 საათზე დაჭრეს, სახლში შემოუვარდნენ, ჩემთან სახლში მე-4 სართულზე, ჩემი შვილიშვილის სტუმრები იყვნენ, გოგოებიც ჰყავდათ, ბიჭებიც, ქეიფობდნენ, შემოვარდა ის კაცი. მანამდე დაურეკა ერთ-ერთს, ქალს, რომელიც ჩვენთან იყო, რაღაც აინტერესებდა ეტყობა. ეს ადამიანი, ვინც ჩემი შვილიშვილი დაჭრა, არ იყო სტუმარი. დაურეკა ერთ-ერთ სტუმარს, ეს არისო მანდო? კი, ჩვენ ვართო და გამოვარდა, ეზოდან შემოვიდა. ამ პიროვნებას მგონი ჩემი შვილიშვილი შორიდან იცნობდა, მაგრამ იმას სხვა ქალბატონი აინტერესებდა, ამიტომ გააკეთა ეს ყველაფერი - არ ვიცი, ასე მეუბნებიან მაგის ნაცნობები და მეგობრები“ , - განაცხადა გოგი თოფაძემ.

ეს არ არის პირველი შემთხვევა, როდესაც ზურაბ ჟვანიას შვილის, ბესარიონ (ბუსა) ჟვანიას სახელმა ფიზიკური დაპირისპირების შემთხვევასთან გაიჟღერა. 2015 წელს მედიაში გავრცელდა ინფორმაცია, რომ ბათუმში, ბუსა ჟვანია გია ბარამიძეს ფიზიკურად დაუპირისპირდა. ბარამიძე ბუსას ბათუმის ერთ-ერთი სასტუმროს ჰოლში შეხვედრია.

ამბობდნენ, რომ თავდაპირველად ბარამიძე გამოლაპარაკებია ბიჭს, უთქვამს, რომ მამამისისთვის არასოდეს უღალატია. ბუსა გაცეცხლებულა, თქვენ მამა მომიკალითო და ბარამიძეს ფიზიკურად გასწორებია. ბარამიძე გავრცელებულ ინფორმაციას სოციალური ქსელით გამოეხმაურა და ბუსასთან ფიზიკური დაპირისპირება უარყო. "ზურას ოჯახის წევრებთან დაპირისპირება არასდროს მქონია და არც მექნება“ - აცხადებდა ბარამიძე.

მაშინ ზურაბ ჟვანიას ძმამ, გოგლა ჟვანიამ "კვირის პალიტრის“ კითხვას ასე უპასუხა - "ფაქტს ვერც უარვყოფ და ვერც დავადასტურებ. ამ თემაზე საუბარი არ მინდა".

ინციდენტთან დაკავშირებით ისაუბრა ზურაბ ჟვანიას მეგობარმა, ყოფილმა პარლამენტარმა ხათუნა ხოფერიამ.

"ამ ინფორმაციის გავრცელებისთანავე ზურას ოჯახს დავუკავშირდი, თუმცა, რადგან მათ ამ ინციდენტზე ღიად საუბარი არ სურთ, მეც თავს შევიკავებ. ვინმესთვის ფიზიკურად გასწორება სიამოვნებას არ მანიჭებს, თუმცა მოთმინებასაც საზღვარი აქვს! ბარამიძეს ზურას ოჯახთან ურთიერთობა წლების განმავლობაში არ ჰქონია, არადა, ზურა მისი უახლოესი მეგობარი და ხელის გამმართავი იყო, ნებისმიერ რთულ სიტუაციაში ბარამიძის გვერდით იდგა.

ზურას ასეთ დამოკიდებულებას ბარამიძემ ხაზი გადაუსვა, მის ოჯახთან მისასვლელი პირი აღარ ჰქონდა. ბუსა 10 წლის იყო, როდესაც ზურა დაიღუპა და მას შემდეგ, ბარამიძე ბავშვთან დასალაპარაკებლად არასოდეს მისულა. ახლა კი, როდესაც ბუსა უკვე თავმოყვარე ვაჟკაცია და ცდილობ, მამამისთან მეგობრობაზე რაღაცები დაუმტკიცო, სხვა რეაქციას რატომ ელოდები?", - ამბობდა ხოფერია.