მეცნიერები კორონავირუსის საწინააღმდეგოდ თამბაქოს ნერგზე დამზადებული ვაქცინის კლინიკურ კვლევას იწყებენ

მსოფლიო კორონავირუსის პანდემიას 2020 წლის 11 მარტიდან ებრძვის და ამ დროისთვის ფარმაკოლოგებმა უკვე შექმნეს რამდენიმე ისეთი ვაქცინა, რომელსაც იმედისმომცემად მიიჩნევენ, თუმცა ჯერჯერობით, გადაჭრით ვერც ერთ მათგანზე ვერ ამბობენ, რომ COVID-19-ის წინააღმდეგ ეფექტური იქნება.

ვირუსის საწინააღმდეგო ერთ-ერთი ექსპერიმენტული ვაქცინა თამბაქოს ნერგებისგან შექმნეს და მისი კლინიკური ცდები რამდენიმე კვირაში დაიწყება. ამის შესახებ bloomber.com წერს.

გამოცემის ინფორმაციით, ვაქცინაზე BAT (British American Tobacoo) მუშაობს. სპეციალისტთა განცხადებით, თამბაქოს ნერგი ვაქცინის სწრაფად შექმნის შესაძლებლობას იძლევა. თუ ცდები წარმატებული აღმოჩნდება, თამბაქოს ნერგზე დამზადებული ვაქცინა მსოფლიოს 2021 წლის პირველ ნახევარში ექნება.

მკვლევართა აზრით, ვაქცინის ერთი დოზაც საკმარისი იქნება კორონავირუსით დაინფიცირებისგან თავის ასარიდებელი იმუნიტეტის გამოსამუშავებლად. ამასთანავე, ვინაიდან თამბაქო არ შეიცავს პათოგენებს, ელიან, რომ არ ექნება გვერდითი მოვლენები და არ გამოიწვევს გართულებებს ვაქცინირებული ადამიანის ორგანიზმში, თუმცა ამის დასადასტურებლად საჭიროა შესაბამისი კვლევის ჩატარება.

ცნობისთვის, კორონავირუსის საწინააღმდეგო ვაქცინაზე სხვადასხვა ფარმაკოლოგიური კომპანიები დამოუკიდებლად მუშაობენ. ყველაზე დიდი იმედით, Moderna-სა და ოქსფორდის უნივერსიტეტის მეცნიერთა მიერ შექმნილ ვაქცინებს უყურებენ.

კვლევები აჩვენებს, რომ აღნიშნულმა ვაქცინებმა ადამიანის ორგანიზმში COVID-19-ის საწინააღმდეგო ანტისხეულები გამოამუშავა. მეცნიერთა თქმით, თუ ყველაფერი ისე წარიმართა, როგორც გეგმავენ, ვაქცინა წლის ბოლოსთვის მზად იქნება.

აღსანიშნავია, რომ კორონავირუსის საწინააღმდეგო ვაქცინა რუსეთშიც შექმნეს და ოფიციალური პირების განცხადებით, მისი საბოლოო ვარიანტი 10 აგვისტომდე ექნებათ. საყურადღებოა, რომ რუსულ ვაქცინას მსოფლიოს მასშტაბით დარგის ექსპერტები ეჭვით უყურებენ. რადგანაც მიაჩნიათ, რომ ის არასათანადო კვლევების შედეგად შეიქმნა.

კორონავირუსის ახალი შტამი COVID-19, ოფიციალური ინფორმაციით, 2019 წლის დეკემბერში, ჩინეთის ქალაქ უხანში გაჩნდა, საიდანაც მთელ მსოფლიოში გავრცელდა. ბოლო მონაცემებით, გლობალური მასშტაბით, ინფიცირებულია 17.5 მილიონი ადამიანი, მათ შორის, 677 454 პაციენტი გარდაიცვალა, ხოლო 10.9 მილიონი გამოჯანმრთელდა. ინფიცირებულთა რაოდენობის მიხედვით კი მსოფლიოს ქვეყნების ათეული ასეთია - აშშ, ბრაზილია, ინდოეთი, რუსეთი, სამხრეთ აფრიკა, მექსიკა, პერუ, ჩილე, ესპანეთი და ირანი.