"ნეტავ, თუ იცის, ასეთი პოპულარული რომ გახდა" - მეეზოვე ქალის სევდიანი სიმღერა, რომელიც სოციალურ ქსელში აიტაცეს

ცოტა ხნის წინ სოციალურ ქსელ "ფეისბუკში" ზუგდიდელი მუსიკოს ლაშა თოდუას გვერდზე მეეზოვე ქალბატონის ქუჩაში ნამღერი მოვისმინე. ქალბატონი ფონოგრამის თანხლებით საოცრად ტკბილად მღეროდა და უამრავი გამოხმაურება ჰქონდა მის შესრულებას. ყურადღება ლაშას სტატუსმა მიიქცია, წერდა, - მომეწონა ამ ქალბატონის ნამღერი და პატარა არანჟირება გავუკეთე, მართლა გულით მღერის, ღმერთმა დიდხანს ამყოფოს, თუ ვინმე იცნობთ, გადაეცით ეს ვერსიაო. მერე კომენტარებს ჩავუყევი და ერთ-ერთი "ფეისბუკმომხმარებლის" გვერდზე ამოვიკითხე: ქალბატონი ქუჩაში მღერის კი არა, მე მგონი, ქუჩაში ცხოვრობს... თუ შეგიძლიათ, დაეხმარეთ, სულ სიონის ტაძრის წინაა, სასულიერო აკადემიასთან. უპატრონო ძაღლები და კატები ჰყავს შემოკრებილი და უვლის. ნეტავ, თუ იცის, ასეთი პოპულარული რომ გახდა, ძალიან გაუხარდება. ძალიან კარგი ადამიანია, თუ დავეხმარებით ძალიან გავუთბობთ გულს. თითქმის სულ იქააო.

ლაშა ზუგდიდში ცხოვრობს, მომღერალი და მუსიკოსია და არანჟირებებსაც აკეთებს. ვიცოდი, ახლაც იქ იყო და გამიკვირდა, როგორ გაუკეთა ფონოგრამა თბილისში, ლამის ქუჩაში მცხოვრებ ქალბატონს. მაშინვე დავურეკე და ყველაფერი გაირკვა.

ლაშა თოდუა:

"ფეისბუკზე" ამ ქალბატონის აკაპელაში ნამღერს გადავაწყდი, უფონოგრამოდ. ძალიან მომეწონა და გადმოვწერე. შემდეგ ჩემს პროგრამაში გავუკეთე არანჟირება, ნამღერს შევუსაბამე, ტაქტში ჩავსვი და კვლავ "ფეისბუქზე" დავდე. მინდა გითხრა, რომ ერთი დეტონაციაც არ ჰქონდა. ნამღერმა აღმაფრთოვანა, შესანიშნავი ხმა აქვს, თბილი, თანაც, ისე გულიანად მღერის, ემოცია ვერ დავმალე. წარმოდგენა არ მაქვს, ვინ არის და ჩემს გაზიარებულს მივაწერე კიდეც, იქნებ ვინმე იცნობდეს და მიაწოდოს ეს ვერსია-მეთქი. მერე კომენტარებში ვნახე, წერდნენ, თბილისელიაო".

როგორც ჩანს, სოციალური ქსელის სხვა მომხმარებლებმაც ამოიცნეს ქალბატონი და კომენტარებში დაწერეს, ერთ დროს ულამაზესი და მოხდენილი ხელოვანი ყოფილა, ახლა კი, სამწუხაროდ, ქუჩაში დარჩენილს მაინც ემღერება... სევდიანად, თუმცა მაინცო...

ირმა ხარშილაძე