"რადისონ ბლუ ბათუმი” ადასტურებს, რომ სასტუმროს ერთ-ერთ სტუმარს კორონავირუსი დაუდგინდა

გასული კვირის განმავლობაში, არაოფიციალურად ვრცელდებოდა ინფორმაცია, რომ ბათუმში ჩარტერული რეისით ჩამოსულ ყაზახეთის მოქალაქეებს შორის, კორონავირუსი რამდენიმე პირს დაუდასტურდა. ამ საკითხზე ოფიციალურ კომენტარს არავინ აკეთებდა, თუმცა იყო ლაპარაკი, რომ სასტუმრო „რედისონი“, რომელსაც ეს ადამიანები სტუმრობდნენ, რამდენიმე ვიზიტორმა პროტესტის ნიშნად დატოვა. ასევე ვრცელდებოდა ინფორმაცია, რომ სასტუმროს ერთი სართული ჩაკეტილი იყო.

კომპანიაში დღეს დაადასტურეს, რომ სასტუმროს ერთ-ერთ სტუმარს კორონავირუსი ნამდვილად დაუდგინდა. ამის შესახებ ინფორმაცია "ინტერპრესნიუსმა" გაავრცელა, რომელსაც გთავაზობთ:

"სასტუმრო რადისონ ბლუ ბათუმის" ერთ-ერთ სტუმარს, ლუგარის ლაბორატორიაში განმეორებით ჩატარებული ტესტირების შედეგად, დაუდგინდა კოვიდ -19, გამოხატული სიმპტომების გარეშე. ტესტირება ორჯერ ჩაუტარდათ მის თანმხლებ და მასთან შემხებლობაში მყოფ ყველა პირს. ტესტების პასუხები უარყოფითია. ყველა მათგანი გადაყვანილია კარანტინში და იმყოფებიან დაკვირვების ქვეშ.

კოვიდ-19 ის დადასტურებული შემთხვევის აღმოჩენის შემდეგ, სტუმარი გადაყვანილი იქნა შესაბამის სამედიცინო დაწესებულებაში. სასტუმრო რადისონის თანამშრობლებმა იმოქმედეს საქართველოს მთავრობის მიერ დადგენილი პროტოკოლით გათვალისწინებული უსაფრთხოების რეგულაციების გათვალისწინებით. ადგილზე მაშინვე მოვიდნენ დაავადებათა კონტროლის ცენტრის (CDC) წარმომადგენლები, რომლებმაც ჩაატარეს მოკვლევა და გასცეს დამატებითი რეკომენდაციები.

ამ დროისათვის სასტუმრო ჩვეულ რეჟიმში განაგრძობს მუშაობას და ემსახურება ტურისტებს. ჩვენთვის ძვირფასია ჩვენი სტუმრების კომფორტი და უსაფრთხოება და ყველაფერს ვაკეთებთ იმისთვის, რომ მათ არ შეექმნათ რაიმე სახის უხერხულობა“.