"გაიგეთ, ერთხელ და სამუდამოდ, წესის აგება დაკრძალვის წინ არაა რაღაც მაგიური რიტუალი..." - რას წერს დეკანოზი

დეკანოზი თამაზ ლომიძე მიცვალებულისთვის წესის აგების ქრისტიანულ ტრადიციაზე განმარტებას აკეთებს:

"ხალხო, ქრისტიანებო, ნუ იქნებით ცრუმორწმუნეები. მიცვალებულისთვის წესის აგება არ არის მისთვის იმქვეყნიური სამყოფელის ავტომატურად მოწყობა. ნუ გგონიათ, რომ ავუგებთ წესს, ამით "დავაჭერთ" იმ ჯადოსნურ ღილაკს, გაიღება სასუფევლის კარები და უფალთან ყველაფერი რიგზეა. ეს ცრურწმენაა. რატომღაც ჩვენს, ქრისტიანობის უცოდნელ ხალხს, წესის აგება საქმის ჩაწყობა-მოგვარება ჰგონია ღმერთთან. თუნდაც მონათლული იყოს კაცი, თუ ცხოვრება ურწმუნოებაში, სიბოროტეში და მოუნანიებელ ცოდვებში გაატარა, მსოფლიოს ყველა ეკლესიებმა და ეპისკოპოსებმა ერთად რომ აუგონ წესი, მაინც ვერაფერს უშველის უფლის სამსჯავროს წინაშე, რადგან "ღმერთთან არაა მიკერძოება" (რომ. 2,11) და ვერც საქმეს ჩაუწყობთ ვერავის. გაიგეთ, ერთხელ და სამუდამოდ, წესის აგება დაკრძალვის წინ არაა რაღაც მაგიური რიტუალი, რომ შეასრულო მიცვალებულისთვის და სასუფეველში მოუგვარო საქმე. წესის აგება იმქვეყნიური სახლის აგება არ გეგონოთ. წესის აგება არის ბოლო დიდი პანაშვიდი, საბოლოო დიდი ლოცვა-ვედრება უფლის წინაშე, რომ მან მიიბაროს და შეიწყალოს მიცვალებულის სული. სხვა დანარჩენიც და ყველაფერიც, რაც მას უფალთან წარდგომისას ელის, დამოკიდებულია მხოლოდ მიცვალებულის პირად რწმენაზე იესო ქრისტესადმი და ცხოვრებაში აღსრულებულ კეთილ საქმეებზე. შეასრულეთ თუ საჭირო გახდა მიცვალებულის გაცილების ეს წესი, მაგრამ სწორად და ქრისტიანულად გესმოდეთ მისი მნიშვნელობა.ნუ გახდებით ვინმესგან ამითი მანიპულაციის მსხვერპლი. ღმერთმა დაიფაროს ყველა!", - წერს დეკანოზი სოციალურ ქსელში.

• "ლუკა სირაძეს წესი ავუგეთ, მაგრამ თუ ვინმე დაგვარწმუნებს, რომ ეს იყო თვითმკვლელობა, დღეიდან სხვანაირად უნდა მოვიქცეთ" - მეუფე ნიკოლოზი
• "სასურველია მეუფე ნიკოლოზმა გადაამოწმოს ინფორმაცია" - რას აცხადებს მეუფის განცხადებაზე გარდაცვლილი 15 წლის ლუკა სირაძის ძმა?
• რა შემთხვევაში არ უგებს ეკლესია წესს მიცვალებულს - "ეს არ არის ბილეთი სასუფეველში"