რა არის მდინარე აჭყვაში თევზების მასობრივად დახოცვის მიზეზი - გარემოს ზედამხედველობის სამსახური წყლის სინჯებს აიღებს
ქობულეთში მდინარე აჭყვაში თევზები იხოცება - ამის შესახებ ქობულეთის საკრებულოს ფრაქცია "ერთიანი ნაციონალური მოძრაობის" წევრმა AMBEBI.GE- ისთან ისაუბრა.
ბონდო თედორაძე ამტკიცებს, რომ თევზების დაღუპვა ციტრუსის ნარჩენებმა გამოიწვია, რომელიც ციტრუსის გადამამუშავებელი ქარხნიდან გაიტანეს და მდინარესა და მის მიმდებარე ტერიტორიაზე დაყარეს. თედორაძის თქმით, ნარჩენები პირდაპირ ქალაქის ტერიტორიაზე ყრია, რაც თევზების დაღუპვასთან ერთად, ცუდს სუნსაც ტოვებს.
"ციტრუსის ნარჩენები მდინარე აჭყვაში შეუშვეს, ეკოლოგიური კატასტროფა მივიღეთ. პატრონი არ გვყავს", - განაცხადა ბონდო თედორაძემ. თავის მხრივ, ქობულეთის მერიაში აცხადებენ, რომ მდინარეში თევზების დახოცვა საწარმოების მიერ მდინარის დაბინძურებას არ გამოუწვევია. ქობულეთის მერიაში ეკოლოგიურ საფრთხეს გამორიცხავენ.
"მინდა მთელი პასუხისმგებლობით განვაცხადო, რომ მდინარე აჭყვასთან დაკავშირებული სუნი და დისკომფორტი არ არის კონკრეტულად რაიმე ეკოლოგიური პრობლემის შედეგი, როგორც ამას აცხადებს ზოგიერთი პოლიტიკოსი, მათ მოსახლეობა შეჰყავთ შეცდომაში. ეს მდინარეში წყლის შემცირებამ გამოიწვია, რაც ორი დღის წინ დაწყებულ სამელიორაციო სამუშაოებს უკავშირდება", - განაცხადეს მერიაში.
გარემოს ზედამხედველობის სამსახური დღეს მდინარიდან სინჯების აღებას გეგმავს, რის შემდეგაც გახდება ცნობილი, რამ გამოიწვია თევზების დაღუპვა