"ყვირილი გაიგონეს, ღია ფანჯარაში, რეაგირება არ იყო... სხვის საქმეში ვერ ჩავერევითო" - რას წერს მეზობელი ქუთაისში მომხდარ საზარელ მკლელობაზე

ქუთაისის ახალგაზრდული ცენტრის დირექტორი, ნატალი პატარიძე, გუშინ ქუთაისში მომხდარი საზარელი მკვლელობის შესახებ წერს. როგორც პოსტიდან ირკვევა, გარდაცვლილი ნატალი პატარიძის მეზობელი იყო:

"წუხელ ჩემს სადარბაზოში მოხდა საზარელი ფაქტი. განსაკუთრებული სისატიკით მოკლეს ქალი. თითქოს რა უნდა თქვა ამაზე მეტი საშინელება, მაგრამ გეტყვით. ყვირილი გაიგონეს, მესამე სართულიდან ღია ფანჯარაში. დაახლოებით წარმოგიდგენიათ ალბათ რა ხმა გამოვიდოდა, რეაგირება არ იყო, შემდეგ ერთ-ერთი ადამიანი მივიდა ეზოში შეკრებილებთან და სთხოვა სასწრაფო გამოეძახა. "სხვის საქმეში ვერ ჩავერევით" (შერბილებული ვარიანტია იმ ფრაზების რაც მუსსირებდა) ხალხმა გააგრძელა ბუტბუტი და ბჭობა. სწორედ ამ დროს დავბრუნდი სახლში, იმას არ აქვს მნიშველობა მე რა გავაკეთე. სამწუხაროდ, ვერ ვუშველე და ეს ყველაზე მეტად მთრგუნავს!", - წერ ნატალი პატარიძე.

ცნობისთვის, ახალგაზრდა ქალი, რომელიც ქუთაისში საცხოვრებელ სახლში ყელგამოჭრილი ნახეს, ელისო ჩეჩელაშვილია. მკვლელობის დეტალებზე AMBEBI.GE-ს გარდაცვლილი ქალის მეზობელი ესაუბრა. შემზარავი ტრაგედია 18 ივლისს, გამსახურდიას ქუჩაზე მოხდა. 30 წლამდე ქალი სახლში ცივი იარაღით მოკლული იპოვეს. ანა ჩალაძის თქმით, ახალგაზრდა ქალს ყელი ჰქონდა გამოჭრილი.

"ეს გოგო თავის დაქალთან ერთად ქირით ცხოვრობდა ჩვენს მეზობლად. როგორც ვიცი, ქუთაისელი იყო. რატომ მოკლეს და ვის შეიძლებოდა ეს სისასტიკე ჩაედინა, ამაზე ვერაფერს გეტყვით. ვიცი, რომ ბინის კარი შიგნიდან იყო ჩაკეტილი. მკვლელობამდე ცოტა ხნით ადრე, გოგო ყვიროდა და შველას ითხოვდა. ალბათ დროულად ვერ მიეშველნენ. მე პატარა ბავშვი მყავს და გვიან მივედი იქ. უკვე პატრული გამოძახებული იყო და კარს ამტვრევდნენ, რომ შიგნით შესულიყვნენ. დანაშაული მრავალსართულიანი სახლის მესამე სართულზე მოხდა. ალბათ რომ მოკლა ფანჯრიდან გადახტა მკვლელი და მიიმალა. საშინელება ხდებოდა. ყველა გაოგნებულია, ასე როგორ გაიმეტეს. მე პირადად არ ვიცნობდი გარდაცვლილს და მომხდარზე მეტი არაფერი ვიცი", - გვიამბო გარდაცვლილის მეზობელმა.

გავრცელებული ინფორმაციით, მეზობლებმა ჯერ მაშველები გამოიძახეს, რომლებიც შინ ვერ შევიდნენ, ვიდრე სამართალდამცავები არ მივიდნენ ადგილზე.