შვილი გადაარჩინა, თავის გადარჩენა კი ვეღარ შეძლო - ტბაში ნაპოვნი ამერიკელი მსახიობის საქმის ახალი დეტალები

5-დღიანი ძებნის შემდეგ, კალიფორნიის სამხრეთით მდებარე პირუს ტბაში 33 წლის ამერიკელი მსახიობის ნაია რივერას ცხედარი იპოვეს.

პოპულარული სერიალის Glee-ს მსახიობი 8 ივლისს დაიკარგა, მას შემდეგ, რაც 4 წლის შვილთან ერთად ტბაში ნავით შეცურა. მოგვიანებით, ნავში ბავშვი იპოვეს, როვერას კვალი კი არსად ჩანდა.

ვენტურას პოლიციის შერიფის ბილ აიუბის თქმით, სავარაუდოდ დედა-შვილი წყალში ცურავდა, ახალგაზრდა ქალმა ძალები მოიკრიბა და შვილი ნავზე დააბრუნა, თავად კი წყლიდან ამოსვლა ვეღარ შეძლო.

4 წლის ბიჭუნამ მაშველებს უამბო, რომ ის და დედა წყალში საცურაოდ ჩავიდნენ, თუმცა დედა ნავზე აღარ დაბრუნდა. დედა-შვილი პირველად ნავის გამქირავებლებმა მოიკითხეს, რადგან რამდენიმე საათი გავიდა და ქირაობის ვადა ამოიწურა. სწორედ მაშინ იპოვეს ნავზე ჩაძინებული ბავშვი, რომელსაც სამაშველო ჟილეტი ეცვა, მეორე ჟილეტი კი გემბანზე იდო.

სამართალდამცველებმა ამოიღეს სათვალთვალო კამერის ჩანაწერებიც, სადაც ჩანს, როგორ გააჩერა მანქანა რივერამ ტბასთან ავტოსადგომზე და ნავის დასაქირავებლად გაემართა შვილთან ერთად.

შერიფის დეპარტამენტის ინფორმაციით, ცხედარი ექსპერტიზაზეა გადაყვანილი. მათივე განმარტებით, ძებნის განმავლობაში, ნაია რივერას ოჯახი - მშობლები და ყოფილი მეუღლე ტბაზე იმყოფებოდნენ:

"მისი ოჯახი ყოვედღიურად აქ იყო, იმედს ეჭიდებოდნენ და მუდმივად ჰქონდათ კომუნიკაცია ჩვენს გამომძიებლებთან" - განაცხადა შერიფმა.

ნაიას, რომელიც პატარა ასაკიდან მონაწილეობდა სერიალებსა თუ სარეკლამო გადაღებებში, უდიდესი წარმატება მოუტანა სერიალში Glee (კლუბი) შესრულებულმა სანტანა ლოპეზის როლმა, განსაკუთრებით კი სერიალის მეორე სეზონიდან, როცა მისი გმირი ერთ-ერთ ცენტრალურ ფიგურად იქცა. ბევრისთვის საყვარელი მუსიკალური სერიალი Fox-ზე 2009 წელს გამოჩნდა და 2015 წელს მისი ბოლო სეზონი გადაიღეს.