როგორ დაეხმარა "სამი მუშკეტერი“ საქართველოს კორონავირუსთან ბრძოლაში - რას წერს BBC ქართველების წარმატებაზე

გავლენიანი ბრიტანული გამოცემა BBC საქართველოზე და ჩვენი ქვეყნის კორონავირუსთან ბრძოლის მეთოდებზე ვრცელ სტატიას აქვეყნებს, როგორც გამოცემა წერს, საქართველო არის ევროკავშირის არაწევრ იმ 15 ქვეყანას შორის, რომელსაც ევროკავშირი უსაფრთხოდ თვლის და საზღვრებს უხსნის. ამასთან, საქართველო ყოფილ საბჭოთა ქვეყნებს შორის არის ერთადერთი, რომელსაც ეს სტატუსი აქვს.

სტატიაში აღნიშნულია, რომ საქართველოში COVID-19-ის 1000-ზე ნაკლები შემთხვევაა აღწერილი და ვირუსით 15 ადამიანი გარდაიცვალა. BBC წერს, რომ მეცნიერთა ჯგუფს, რომელსაც "სამ მუშკეტერს" უწოდებენ, ადიდებენ პანდემიასთან წარმატებული რეაგირების გამო.

სტატიაში საქართველო მეზობელ სომხეთთანაა შედარებული და აღნიშნულია, რომ სომხეთში ყოველ დღე COVID-19-ის ასობით შემთხვევა ვლინდება, ხოლო ინფიცირებულთა საერთო რაოდენობა 26 ათასს აჭარბებს, გარდაცვლილი კი 500 ადამიანია.

• როგორ მიაღწია საქართველომ ამ შედეგს?

გამოცემა წერს, რომ საქართველოში კორონავირუსის პირველი შემთხვევა თებერვლის მიწურულს გამოვლინდა და სახელმწიფოს ჰქონდა სწრაფი რეაქცია. მარტის შუა რიცხვებში დაიკეტა ყველა სკოლა, უნივერსიტეტი, ბიზნესის ნაწილი, ასევე შეჩერდა საზოგადოებრივი ტრანსპორტის მუშაობა. 21 მარტს აიკრძალა ხალხმრავალი შეკრებები, ქვეყნის შიგნით მოგზაურობა, დაწესდა ე.წ. კომენდანტის საათი.

მართლმადიდებლური აღდგომის დროს, რომელიც საქართველოში ყველაზე მნიშვნელოვანი რელიგიური დღესასწაულია, მთავრობამ აკრძალა ტრანსპორტით გადაადგილება და დაიკეტა სასაფლაოები.

"პირველ დადასტურებულ შემთხვევამდე ერთი თვით ადრე გავითვალისწინეთ პანდემიის საფრთხე. ჩვენი ქვეყნის სპეციფიკის გათვალისწინებით, როგორიცაა ჩვენი მდებარეობა და მცირე ზომა, ჩვენ ვერ გამოვიყენეთ სხვა ქვეყნების მაგალითი“, - ამბობს პრემიერ-მინისტრი გიორგი გახარია BBC-სთან საუბრისას.

გამოცემა წერს, რომ კორონავირუსთან დაკავშირებულ საინფორმაციო კამპანიას და რეგულარულ სიახლეებს უძღვებოდნენ ქვეყნის ტოპ მეცნიერები და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრი.

სტატიაში ასევე საუბარია ლუგარის ლაბორატორიაზეც და აღნიშნულია, რომ ეს ლაბორატორია რუსული დეზინფორმაციის მუდმივი სამიზნეა და რომ რუსეთი მუდმივად საუბრობს იმაზე, რომ ლუგარის ლაბორატორია აშშ-ის საიდუმლო ბიო-იარაღის პროგრამის ნაწილია.

• ვინ არიან მუშკეტერები?

გამოცემა წერს, რომ საქართველოში ქვეყნის დაავადებათა კონტროლისა და საზოგადოებრივი ჯანმრთელობის ეროვნული ცენტრის მეცნიერები თავიანთი გადაწყვეტილებებით დიდი პატივისცემით სარგებლობენ.

ტრიოში შედის დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი ამირან გამყრელიძე, ლუგარის ლაბორატორიის ხელმძღვანელი პაატა იმნაძე და მთავარი ვირუსოლოგი, თენგიზ ცერცვაძე, რომელიც თბილისის ინფექციური დაავადებების, შიდსისა და იმუნოლოგიის კვლევით ცენტრს ხელმძღვანელობს, - წერს BBC.

სტატიის ავტორი ასევე აღნიშნავს, რომ კიდევ ერთი პოპულარული ფიგურა მარინა ეზუგბაიაა, რომელიც თბილისის ინფექციური საავადმყოფოს სამედიცინო დირექტორია. BBC წერს, რომ საქართველოში 19 ლაბორატორიაა, სადაც კორონავირუსზე ტესტის გაკეთებაა შესაძლებელი.

• როგორ მიაღწია საქართველომ კორონავირუსთან წარმატებას?

"დაწესდა მძიმე ჯარიმები მათთვის, ვინც საგანგებო მდგომარეობის წესებს დაარღვევდა - დაახლოებით, 1000 დოლარი ფიზიკური, ხოლო 3000 დოლარი იურიდიული პირებისთვის. გაფრთხილება "დარჩი სახლში“ განთავსდა ავტობუსის გაჩერებების ციფრულ მონიტორებზე, ასევე იგივე მესიჯს ადამიანებს უგზავნიდნენ ტელეფონზე მობილური ოპერატორები.

მიუხედავად პოლიტიკური პოლარიზაციის ტიპიურად მაღალი ხარისხისა, ქართული საზოგადოება ფართოდ უჭერდა მხარს ეპიდემიასთან ბრძოლის მცდელობებს“, - წერს BBC.

გამოცემის ცნობით, პრემიერ-მინისტრმა აღნიშნა, რომ ქართველების თანამშრომლობამ და სამაგალითო სოციალურმა პასუხისმგებლობამ ყველა შესაბამისი ინსტრუქციისა და რეკომენდაციის შესრულებაში ხელი შეუწყო ინფექციასთან წარმატებულ ბრძოლას.

BBC წერს, რომ მთავარი ტესტი აღდგომას დადგა, როდესაც შიშობდნენ, რომ ათასობით ადამიანი დაესწრებოდა ღამით ტაძრებში ღვთისმსახურებას. ქვეყნის ძლიერმა მართლმადიდებლურმა ეკლესიამ უარი არ თქვა ზიარების დროს საერთო კოვზის გამოყენებაზე, მაგრამ ადამიანთა უმეტესობამ მეცნიერთა რჩევა გაითვალისწინა და სახლებში დარჩნენ.