"შაქარაშვილის სურათი რომ ნახა ტირილი აუტყდა, ჩვენს გამო როგორ მოკვდაო" - რას ჰყვება დაკავებული არასრულწლოვანის მამა

19 წლის ფეხბურთელის გარდაცვალების საქმეზე დაკავებული არასრულწლოვანის მამა ამბობს, რომ მისი შვილი გიორგი შაქარაშვილს არ იცნობდა და არც მომხდართან აქვს შეხება.

თამაზ ხამასურიძემ საბედისწერო წვეულებაზე მომხდარი ინციდენტზე შვილის ვერსია "კურიერს" მოუყვა.

"ჩხუბი ნაქირავებ აგარაკზე საბურთალოელებსა და ნახალოვკელებს შორის დაიწყო, სადაც ვახო ჩიქოვანი გასაშველებლად შევიდა და თავში ბლაგვი საგანი მოხვდ. ჩემი ბიჭი შიგნით იყო. როდესაც ყველა გარეთ გავიდა, მეც გავყევიო, მითხრა. ჰაერზე რომ გამოვედი, რაღაცამ იმოქმედა და ცუდად გავხდიო, იქვე ხეს მივეყუდეო. 5-10 წუთში მორჩა ეს ყველაფერი, ჩემი ძმაკაცი ვახო ჩიქოვანი მოვიდა, ამაყენა და ჩამსვა მანქანაშიო. რომ მოვდიოდით ავტობანზე, ძილბურანში ვიყავი და უცებ მანქანა გაჩერდაო. ყველა რომ გადახტა მეც გადავხტი მანქანიდან, ავარია მეგონაო. დავეწიე და ვეკითხები რა ხდებაო, გადავირბინეთ შუა გაზონი და იქ, რომ მივირბინეთ ბიჭები აღარ იყვნენ დაიმალნენო, ანუ რომ დაინახეს, რომ მივრბოდით, დაიმალნენო.

მე იქ გავჩერდიო. მოვიდნენ ბიჭები და მითხრეს, წადი მანქანა მოიყვანე და ჩვენ ამათ ვნახავთო. წავედიო და მანქანა მოვიყვანეო. ამ დროს უკვე გურამ ამირხანაშვილი ჰყავდათ თურმე ნაპოვნი, ბუჩქებიდან ამოუყვანიათ. მანქანაში ჩავისვით და ვუთხარით, რომ თუ გინდა აქ დარჩი, მოძებნე შენი მეგობარი და ერთად წაგიყვანთო. უთქვამს, არაო. გიორგი შაქარაშვილი ჩემს ბიჭს არ უნახავს. ამ ბიჭის სურათი რომ ნახა ტირილი აუტყდა, როგორ მოკვდა ჩვენს გამო ეს ბიჭიო," - განაცხადა არასრულწლოვნის მამამ "კურიერთან" საუბრისას.

ცნობისთვის, ფეხბურთელ გიორგი შაქარაშვილის გარდაცვალების საქმეზე სამართალდამცავებმა 17 პირი დააკავეს. დაკავებულებს ედავებიან ძალადობას, ძალადობის ორგანიზებას, მასში მონაწილეობას, რასაც თან ახლდა რბევა, იარაღის გამოყენება, სახელმწიფო წარმომადგენლისადმი წინააღმდეგობის გაწევა, ასევე ედავებიან თავისუფლების უკანონო აღკვეთას, ხულიგნობასა და დანაშაულის შეუტყობინებლობას.

დაკავებულებს შორის არიან: ვასილ მახარაძე, არჩილ გაგნიძე, თენგო ბარბაქაძე, საბა ჩხარტიშვილი, ირაკლი მუმლაძე, ნიკა ჟვანია, ირაკლი წაქაძე, გიგა ტატიაშვილი.

19 ივნისს, დაახლოებით 11:00 საათზე, გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი საძიებო სამუშაოების შედეგად, მყვინთავებმა ფეხბურთელ გიორგი შაქარაშვილის ცხედარი წყალში იპოვეს.