ხანძარი ვარკეთილის ბაზრობაზე - ფოტოები შემთხვევის ადგილიდან, სადაც მეხანძრე-მაშველები ცეცხლს 3 საათის განმავლობაში ებრძოდნენ

ვარკეთილში, შუამთის ქუჩაზე, მდებარე შერეული ტიპის ბაზრობაზე ხანძარი გუშინ, დაახლოებით ღამის 11 საათისთვის გაჩნდა. ადგილზე საგანგებო სიტუაციების მართვის სამსახურის 130-მდე მეხანძრე-მაშველი და 25 ერთეული სახანძრო-სამაშველო ტექნიკა მუშაობდა, უსაფრთხოების მიზნით, პერიმეტრი სამართალდამცველებმა გადაკეტეს.

ცეცხლი სასაწყობე ჯიხურებზე იყო გავრცელებული. პირველადი ინფორმაციით, დაიწვა ტანსაცმელი და სხვადასხვა სახის სარეალიზაციოდ გამზადებული ნივთები.

ხანძრის დროს დაშავდა ორი პირი, მათ შორის ერთი პოლიციელი.

"ერთი დაშავებული მოქალაქე ფეხის ტრავმით გადაყვანილია „ოპტიმა მედში“. პოლიციელს რაც შეეხება, მან უარი განაცხადა ჰოსპიტალიზაციაზე. მას დაკვამლიანებისგან ჰქონდა მსუბუქი სუნთქვის უკმარისობა“, - განაცხადეს სიტუაციების კოორდინაციისა და გადაუდებელი დახმარების ცენტრში.

ცეცხლის სრული ლიკვიდაცია მეხანძრე-მაშველებმა დაახლოებით სამ საათში შეძლეს.

საგანგებო სიტუაციების მართვის სამსახურის თბილისის მთავარი სამმართველოს უფროსის ოთარ კერესელიძის განცხადებით, მაშველებმა ძალიან რთულ პირობებში იმუშავეს:

"ბაზრობაზე გაჩენილი ხანძარი ფაქტობრივად ლიკვიდირებულია, არანაირი გავრცელების საფრთხე არ არის. არის დარჩენილი პატარა კერები, სადაც განთავსებულია ადვილად აალებადი ტანსაცმელი და პლასტმასის ნივთები. მეხანძრე მაშველები მთელი ღამის განმავლობაში განახორციელებენ სამუშაოებს.

მათ მოუხდათ ძალიან რთულ ვითარებაში მუშაობა, თუმცა, ხანძრის გავრცელების საფრთხე არ არის. იყო საფრთხე, რომ ხანძარი გადასულიყო ბენზინგასამართ სადგურზე და გვერდით მდებარე კორპუსზე და ბაზრობის კიდევ სხვა ნაწილზე“, - განაცხადა კერესელიძემ.

პირველადი დათვალიერებით დამწვარია დაახლოებით 4000 კვ.მ ბაზრობის ტერიტორია. შსს-მ ფაქტზე გამოძიება საქართველოს სსკ-ს 187-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს.

ფოტო და ვიდეომასალა - საგანგებო სიტუაციების მართვის სამსახური