"არ მოგვწონს, რაც "TV პირველზე" ხდება და ვერც ვერაფერს ვცვლით" - ვახო სანაიამ და ნინო ჟიჟილაშვილმა ტელეკომპანია დატოვეს

ვახო სანაია და ნინო ჟიჟილაშვილი "TV პირველს" ტოვებენ. ამის შესახებ ტელეწამყვანებმა განცხადება დღევანდელი "პოლიტმეტრის" დასასრულს გააკეთეს და აღნიშნეს, რომ ეს გადაცემის ბოლო გამოშვება იყო. ტელეკომპანიას ტოვებს ასევე, "პოლიტმეტრის" სარედაქციო შემადგენლობა, პროდუსერები და ჟურნალისტები.

"ეს იყო "პოლიტმეტრის" ბოლო გადაცემა "TV პირველზე"... როდესაც ამ შენობაში შემოვედი, "TV პირველი" არც არსებობდა, ეს არხი მაშინ ჯერ კიდევ სპორტული იყო, აქ გავატარე ჩემი ცხოვრების 5 წელი. ამდენი ხანი არც ერთ ტელევიზიაში არ მიმუშავია და ამას ჰქონდა კონკრეტული მიზეზი. აქ ჩვენ ყველამ ერთად შევმენით საინტერესო სივრცე და გარემო, ვიყავით გავლენების მიღმა, მოვლენების შუა გულში. იყო სხვა ფატქორებიც, მედიასტანდარტი, ასევე ნიშა, რომლითაც "TV პირველმა" საკუთარი თავი იპოვა და დაიმკვიდრა. შენებას დიდი ხანი უნდა, ნგრევას ერთი დღე ჰყოფნის, ნდობას მოპოვება უნდა, დაკარგვა ადვილია, - ეს სულ გვახოვდა ამ წლების განმავლობაში, როდესაც სხვებთან ერთად აქ ვმუშაობდით, მთელი ხუთი წელი, სწორედ ამ პრინციპებით ვხელმძღვანელობდით. რა და როგორ გამოგვდიოდა, ეს უკვე თქვენი შესაფასებელია, ახლაც და მომავალშიც.

თანამშრომლობის რესურსი, როგორც აღმოჩნდა, ამოწურულია. კერძო არხს უფლება აქვს ისე გააგრძელოს, როგორც თავად მიაჩნია საჭიროდ, ჩვენც ვიყენებთ უფლებას, მივიღოთ ეს გადაწყვეტილება.

"TV პირველს" "პოლიტმეტრის" ავტორებთან ერთად, ტოვებს მისი სარედაქციო შემადგენლობაც, პროდუსერები - გიორგი დარჩიაშვილი, პროდუსერი და ჟურნალისტი ხატია შამანაური. ჟურნალისტი გიორგი კიკაბიძე, პროდუსერი და ჟურნალისტი სოფო მაისურაძე და პროდუსერი მიხო კოტეტიშვილი", - განაცხადა ვახო სანაიამ.

ჯერჯერობით უცნობია, სად გააგრძელებენ მუშაობას ჟურნალისტები, თუმცა მათი თქმით, მაყურებელი მათ ახალ სივრცეში აუცილებლად იხილავს და კონკრეტულად სად, ამის შესახებ მოგვიანებით შევიტყობთ.

"მიზეზი არხის განვითარების პროცესია, სადაც ჩვენი ხედვები აღარ ემთხვევა არხის მენეჯმენტის ხედვებს. ამ წასვლას არ ახლავს თან პერსონალური საკითხები. აქ საუბარია მხოლოდ საქმეზე და ფუნდამენტურ განსხვავებაზე. "TV პირველში" ჩვენ არასდროს ვყოფილვართ მხოლოდ ჯურნალისტები, არხის ეთერში გასვლის დღიდან, ჩართულნი ვიყავით ყველა გადაწყვეტილებაში, რაც აქ მიიღებოდა, სახელისუფლებო შეტევების მოგერიებაში, რაც საკმარისად იყო. ჩვენ ამ არხზე თითოეულ ნაბიჯზე ვიღებდით პასუხისმგებლობას, რაც სამწუხაროდ, ახლა უკვე აღარ გამოგვდის. ძალიან მარტივად და გულწრფელად რომ გითხრათ, ჩვენ უბრალოდ არ მოგვწონს, რაც ჟურნალისტური სტანდარტის, გემოვნებისა და ყველა სხვა კომპონენტის თვალსაზრისით ხდება, არ მოგვწონს და ვერც ვერაფერს ვცვლით. 5 წლის თავზე ჩვენი გზები იყოფა", - განაცხადა ნინო ჟიჟილაშვილმა.

მიმართვის დასასრულს ტელეწამყვანებმა მადლობა გადაუხადეს არხის შემქმნელებს, არხის დამფუძნებელს ვატო წერეთელს, ჟურნალისტებსა და მაყურებელს.

შეგახსენებთ, საკადრო ცვლილებების ტალღა "ტვ პირველში" ნოდარ მელაძის მისვლით დაიწყო, რომელიც ტელეკომპანიის გენერალურ პროდიუსერად დანიშნა მაშინდელმა გენერალურმა დირექტორმა ინგა გრიგოლიამ. თუმცა, ხელმძღვანელის ამ გადაწყვეტილებას ტელეკომპანიის ყველა თანამშრომელი აღფრთოვანებით არ შეხვედრია.

VIDEO: რა ხდება "ტვ პირველში" - ტოვებენ თუ არა არხს წამყვანი სახეები

ფარული შიდა დაპირისპირების პირველი ნიშანი ის იყო, რომ ტელეწამყვანმა ნინო ჟიჟილაშვილმა "პირველის" საინფორმაციო სამსახურის უფროსის პოსტი დატოვა და გადაწყვეტილება იმით ახსნა, რომ მისი და "არხის ხელმძღვანელობის ხედვები საინფორმაციო სამსახურის განვითარების მიმართულებით, ამ ეტაპზე ერთმანეთს არ დაემთხვა".

თუმცა, ამის მიუხედავად ჟიჟილაშვილმა კვლავ განაგრძო მუშაობა "პოლიტმეტრში" და დაანონსდა ისიც, რომ მისი წამყვანობით არხზე კიდევ ერთი თოქ-შოუ იწყებოდა.

მაისის დასაწყისში თანამდებობიდან წასულ ჟიჟილაშვილს, ივნისის დასაწყისში ინგა გრიგოლია მიჰყვა. მან "ტვ პირველის" გენერალური დირექტორის პოსტი დატოვა და მიზეზად დაასახელა ის, რომ "მისი საქმიანი და ოჯახური ინტერესები ძალიან შეეჯახა ერთმანეთს".