"დათო ჰაერივით სჭირდება უამრავ ადამიანს..." - ავარიის დროს დაშავებულ ცნობილ ფსიქიატრს საზოგადოების დახმარება ესაჭიროება

ცნობილ ექიმ-ფსიქოთერაპევტს, ფსიქიატრსა და ნარკოლოგს დავით ანდღულაძეს საზოგადოების დახმარება ესაჭიროება. 22 მაისს ის ავტოსაგზაო შემთხვევაში მოყვა - ქვეყანაში "კომენდანტის საათის" გაუქმების შემდეგ, თამარაშვილის ქუჩაზე სახლისკენ ველოსიპედით მიმავალ ანდღულაძეს, მანქანა დაეჯახა.

ავარიის შედეგად მან სერიოზული დაზიანებები მიიღო, თუმცა ექიმები დამაიმედებელ პროგნოზს აკეთებენ.

პაციენტის მკურნალობის და რეაბილიტაციის ხარჯები საკმაოდ მაღალია და დავით ანდღულაძის დასახმარებლად მისმა მეგობრებმა ანგარიშის ნომერი გახსნეს, სადაც ნებისმიერ მსურველს შეუძლია თანხის ჩარიცხვა.

"დავეხმაროთ დათო ანდღულაძეს!

დათოს ოჯახის და ახლობლების სახელით, უღრმეს მადლობას გიხდით თითოეულ თქვენგანს დათოს გულშემატკივრობისთვის, ყურადღებისთვის, სიყვარულისთვის.

ორიოდ სიტყვით დავით ანდღულაძის შესახებ მათთვის, ვინც მას არ იცნობს: დათო ცნობილი ექიმი-ფსიქოთერაპევტი, ფსიქიატრი, ნარკოლოგი, ფსიქოსოციალური კვლევის და მომსახურების ასოციაცია "ნებას" დამფუძნებელია. ფსიქოლოგიის და ფსიქიატრიის არაერთ აქტუალურ თემაზე ჩატარებული აქვს უამრავი საჯარო ლექცია, შეხვედრა, ინტერვიუ. ოღონდ, ვინც მას იცნობთ დამეთანხმებით, რომ ეს მხოლოდ მშრალი სიტყვებია, ზღვაში წვეთია დათოს პროფესიონალიზმის და ადამიანობის ასაღწერად, მის მიერ დათესილი სიკეთის გადმოსაცემად. დათო ჰაერივით სჭირდება უამრავ ადამიანს.

22 მაისის ღამით, საგანგებო მდგომარეობის გაუქმებიდან მალევე, ველოსიპედით მიმავალ დავითს თბილისში, თამარაშვილის ქუჩაზე ავტომანქანა დაეჯახა. დათოს გატეხილი აქვს ნეკნები, დაზიანებული აქვს ფილტვი, ზურგის ტვინი, აქვს მრავლობითი მოტეხილობები, ჩაუტარდა გადაუდებელი ოპერაცია კისრის მალებზე. დათო კრიზისული მდგომარეობიდან გამოვიდა. ახლა მისი მდგომარეობა ნელ-ნელა უმჯობესდება.

დათოს ხანგრძლივი და ინტენსიური სარეაბილიტაციო მკურნალობა ესაჭიროება. საჭირო გახდება მისი საზღვარგარეთ გამგზავრებაც. ეს ყველაფერი ძალიან დიდ თანხებთან არის დაკავშირებული. ოჯახი აქამდე უძღვებოდა ამ პრობლემებს და დათოს ფინანსური დახმარების საკითხი დღემდე არც დამდგარა. დათოს ოჯახის წევრებს დღესაც ერიდებათ მსგავსი განცხადების გავრცელება და ვინმეს შეწუხება, თუმცა შექმნილი მდგომარეობა არჩევანის საშუალებას არ გვაძლევს.

ამჟამად ჩვენს დათოს - სიკეთის, სითბოს, სიყვარულის უშურველად და უხვად გამცემ ადამიანს გამოჯანმრთელებისთვის ძალიან ესაჭიროება ჩვენგან ფინანსური დახმარება.

გთხოვთ, გააზიაროთ ეს გზავნილი. დროულად დავეხმაროთ, გვერდში დავუდგეთ ჩვენს არაჩვეულებრივ დათოს და მის ოჯახს. ვინც მას იცნობთ, ხომ ეჭვიც არ გეპარებათ, რომ გამოჯანმრთელებული დათო ერთი ათასად აგვინაზღაურებს ყველაფერს მისი გონებით, გულით, ცოდნით, ენერგიით, სიკეთით და სიყვარულით. ერთად ყველაფერს შევძლებთ!

დათო ანდღულაძის დახმარების მსურველებს თანხის ჩარიცხვა შეგიძლიათ ანგარიშზე:

საქართველოს ბანკი:

GE04BG0000000125920900

მიმღები: სოფიო ანდღულაძე / Sopio Andghuladze

დანიშულება: შემოწირულობა დავით ანდღულაძისთვის