პოლიციამ გორში მომხდარი ჩხუბის ფაქტზე გიორგი კანდელაკის შვილი დააკავა

პოლიციამ გორში ჯანმრთელობის განზრახ მძიმე დაზიანების ფაქტზე მოკრივე გიორგი კანდელაკის შვილი თარაშ კანდელაკი დააკავა. დაკავების შესახებ განცხადებას შინაგან საქმეთა სამინისტრო ავრცელებს.

"შინაგან საქმეთა სამინისტროს შიდა ქართლის პოლიციის დეპარტამენტის გორის რაიონული სამმართველოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1998 წელს დაბადებული თ.კ. ჯანმრთელობის განზრახ მძიმე დაზიანების ბრალდებით დააკავეს.

დანაშაული 3-დან 6 წლამდე თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა, ურთიერთშელაპარაკების ნიადაგზე, ქალაქ გორში, სტალინის ქუჩაზე მდებარე რესტორან "ჯოზეფში", 2001 წელს დაბადებულ ე.თ.-ს ფიზიკური შეურაცხყოფა მიაყენა. მძიმედ დაშავებული ე.თ. სამედიცინო დაწესებულებაში გადაიყვანეს. გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს, რაც ჯანმრთელობის განზრახ მძიმე დაზიანებას გულისხმობს" - ნათქვამია განცხადებაში.

ცნობისთვის, გორში ჩხუბი გუშინ მოხდა, რა დროსაც 18 წლის ახალგაზრდა ძლიერად დაშავდა. მისი ჯანმრთელობის მდგომარეობა კრიტიკულად მძიმეა. პაციენტს კლინიკა „გორმედში“ გვიან ღამითვე ჩაუტარდა გადაუდებელი ოპერაცია. იგი ამ დროისთვის თბილისში, სპეციალიზებულ კლინიკაშია გადმოყვანილი.