მგზავრებს პირბადის ტარება თვითმფრინავის ბორტზეც მოუწევთ - რა წესების დაცვით იქნება დასაშვები  ავიამგზავრობა?

ჯანდაცვის სამინისტროს რეკომენდაციების თანახმად, თვითმფრინავში მგზავრები დისტანციის დაცვით უნდა განლაგდნენ. ამასთან, მგზავრები საჰაერო ხომალდზე ნიღბების გარეშე არ დაიშვებიან.

ჯანდაცვის სამინისტრომ აეროპორტებისა და საჰაერო ტრანსპორტისთვის კორონავირუსთან დაკავშირებული რეკომენდაციები დაამტკიცა, რომლის თანახმადაც, გამგზავრების ტერმინალში და საჰაერო ხომალდიდან ჩამოსვლისას პერსონალს და მგზავრებს ტემპერატურას გაუზომავენ. ამასთან, თვალსაჩინო ადგილას განთავსდება განცხადებები (რამდენიმე ენაზე) COVID-19-ის პრევენციული ღონისძიებების შესახებ. მგზავრები/მომსახურე პერსონალი დაიშვება მხოლოდ დამცავი ნიღბით და ამ მხრივ გამონაკლისი შეიძლება იყოს 6 წლამდე ბავშვი.

რაც შეეხება უშუალოდ ბორტზე შესასრულებელ რეკომენდაციებს, მინიმუმამდე მცირდება მომსახურება, ბორტზე იკრძალება პროდუქტის გაყიდვა, ეკიპაჟის წევრები აღჭურვილნი უნდა იყვნენ ინდივიდუალური დამცავი საშუალებებით (ნიღაბი, სათვალე/დამცავი ფარი, ხელთათმანი).

„3 საათზე ნაკლები ხანგრძლივობის ფრენისას აკრძალეთ მგზავრთა კვებით უზრუნველყოფა. სხვა შემთხვევაში გამოიყენეთ წინასწარ შეფუთული და დალუქული საკვების და სასმელი პროდუქტების, მიწოდების სერვისი,“ - აღნიშნულია რეკომენდაციებში.