"ამ გზით შემოვიდნენ ჩატაევი და მისი რაზმი... რაღაც წესრიგში არ არის" - ვინ არის თურქი ბინალი ჩამქოზი, რომლის დაჯგუფების წევრები ბათუმში დააკავეს

2 ივნისს, ბათუმის ცენტრში დაკავებული თურქეთის 9 მოქალაქის საქმეს, რომელთაც წინასწარი პატიმრობა უკვე შეუფარდეს, "გრიფით საიდუმლო" ადევს. გამოძიება საზღვრის უკანონო კვეთის, ასევე ცეცხლსასროლი იარაღის შეძენის, შენახვის, ტარებისა და დამზადების მუხლებით დაიწყო.

თუმცა დაკავებულების ადვოკატის მტკიცებით, ბრალდებულებისთვის გამოძიებას ბრალი ცეცხლსასროლი იარაღის ნაწილში არ წარუდგენიათ. მისივე თქმით, ტერორიზმი გამორიცხულია, თუმცა ამბობს, რომ გაუთქმელობაზე ხელი მოაწერინეს, რის გამოც, სხვა დეტალებზე საუბრისგან თავს იკავებს.

შესაბამისად, უცნობია, რას საქმიანობდნენ ბრალდებულები ბათუმში, ან რატომ მოუწიათ უკანონოდ საზღვრის კვეთა საქართველოში შემოსასვლელად. ბრალდებულები დუმილის უფლებით სარგებლობენ.

ადვოკატის თქმით, "დაკავებამდე რამდენიმე თვით ადრე, ერთ-ერთმა ბრალდებულმა საქართველოში პოლიტიკური თავშესაფარი მოითხოვა, თუმცა პანდემიის გამო იუსტიციის სამინისტროში ჩანიშნული შეხვედრა ჩაიშალა.

შეკითხვაზე, ჰქონდათ თუ არა ბრალდებულებს სუს-ის თანამშრომლისგან სახლი ნაქირავები, პროკურორი პასუხობს, რომ ამასთან დაკავშირებით, გამოძიების ინტერესებიდან გამომდინარე, ვერ ისაუბრებს.

არსებული ინფორმაციით, დაკავებულია თურქეთში მოქმედი კრიმინალური დაჯგუფების 9 წევრი, რომელთა ლიდერი ბინალი ჩამქოზია. თავად ლიდერის დაკავებაზე ოფიციალურად არავინ საუბრობს. სასამართლოში პროკურატურასაც არ უხსენებია ბინალი ჩამქოზი, თუმცა მეზობელი ქვეყნის სამართალდამცავი უწყებები ირწმუნებიან, რომ ის ჩვენს ქვეყანას აფარებს თავს.

მის დაჯგუფებას ბრალად იზმირის ვიცე-მერის აფეთქება და მისი მკვლელობის მცდელობა ედება. კიდევ ერთი ვერსიით, მან ეს საქმე საქართველოდან დაგეგმა, 12 იანვარს აფეთქება სცადეს და ამის შემდეგ თურქ სამართალდამცველებს საქართველოში გამოექცნენ.

გახმაურებული საქმის შესახებ თურქოლოგი ზურა ბატიაშვილი საუბრობს:

- ჯერჯერობით, ამ საქმიდან ბევრი რამ არ არის ცნობილი, რადგან საქმეს გრიფის საიდუმლო ადევს, მაგრამ რაც ცნობილია, იქიდან ირკვევა, რომ რაღაც წესრიგში არ არის და შესაძლოა, ეს ვიღაცის შემთხვევითი შეცდომა კი არა, სისტემური ჩავარდნა იყოს... თურქული მედიის ცნობით, ეს ის ცნობილი ბინალი ჩამგოზი არ არის, რომლის გარშემოც ამდენი ხანია საუბარია. ამ ადამიანებმა საზღვარი უკანონო, მარადიდის გზით გადმოკვეთეს და თუ მათ შორის ნამდვილად არის ჩამგოზი, რომელიც წელს ქვემოთ მოწყვეტილია, საქმე იმაზე რთულად არის, ვიდრე ერთი შეხედვით ჩანს.

ამ გზით შემოვიდნენ ჩატაევი და მისი რაზმი. უკანონო გზით შემოსასვლელად, ეს არის ყველაზე გავრცელებული მონაკვეთი....

თუმცა იმდენად რთული გზაა, თუ ძალიან კარგად არ არის ორგანიზებული ადამიანების ჯგუფი, მისი გავლა შეუძლებელიც კი არის, მით უფრო ისეთი ადამიანისთვის, რომელსაც დამოუკიდებლად გადაადგილება არ შეუძლია. ამიტომაც არ მიმაჩნია უსაფუძვლოდ ის ეჭვი, რომ დაკავებულთა შორის ბინალი ჩამგოზი არ არის.

იცით, რომ მას ბრალად იზმირის ვიცე-მერის აფეთქება ედება. მისი დაჯგუფების წევრები 13 ორგანიზებულ დანაშაულში მონაწილეობდნენ. ბათუმში ჩატარებული სპეცოპერაციის კვალდაკვალ, თურქულმა სპეცრაზმმა იზმირშიც ჩაატარა ოპერაცია. როგორრ ჩანს, თურქულმა მხარემ მიაწოდა ქართველ სამართალდამცველებს ინფორმაცია და სპეცოპერაცია ერთდროულად ჩაატარეს.

- ითქვა, მისი ფეთჰულა გიულენთან (ერდოღანის მთავარი ოპონენტი, თურქეთიდან ამერიკაში გახიზნული სასულიერო ლიდერი) შესაძლო კავშირის შესახებაც...

- არა მგონია ეს ვერსია რეალობასთან ახლოს იყოს. ერთადერთი, ამ ეტაპზე რაც ირკვევა, მხოლოდ კრიმინალური დაჯგუფების ინტერესებია...

აღმოსავლეთმცოდნე სანდრო ბაკურაძე AMBEBI.GE-სთან საუბარში თურქეთში ბოლო დროს მიმდინარე პროცესებზე საუბრობს, რომელიც შესაძლოა, ბინალი ჩამგოზის საქართველოში გამოქცევის მიზეზი მართლა გამხდარიყო.

- იზმირის პროვინციაში, ბინალი ჩამგოზის კრიმინალური დაჯგუფება, დაკავშირებულია, როგორც მუნიციპალიტეტებთან, ისე მთავარი ოპოზიციური - სახალხო რესპუბლიკური პარტიის რეგიონულ ორგანიზაციებთანაც, რადგან ის იზმირში წამყვანი პოლიტიკური ძალაა. ასევე, ჩამგოზის ჯგუფი ოპოზიციის მიერ კონტროლირებადი მუნიციპალიტეტის ტენდერების და ფინანსურ საქმეებთან არის დაკავშირებული.

მისი ინტერესები იკვეთება ფოჩას რაიონის მერთან, ფატიჰ გურბუზთანაც და ასევე უკავშირდება წინა მერის კადრების სამსახურიდან გათავისუფლებას. ალი რიზა ქოჩერი, რომელიც თავდასხმის მსხვერპლი გახდა, აცხადებდა, რომ ამ საქმის უკან, ჩიღლის წინა მერის ჰასან არსლანის ნათესავებიც იდგნენ.

ერთი სიტყვით, სავარაუდოდ, საქმე უკავშირდება იზმირის პროვინციის ჩიღლისა და ფოჩას რაიონში ბიზნესების გადანაწილებას. ასევე, ჩიღლის მერიაში ძველი და ახალი მერების კადრებს შორის დაპირისპირებას.

- როგორც თურქული მედია წერს, ერთმანეთშია არეული პოლიტიკური და კრიმინალური ინტერესები...

- იქ არის რეგიონული, რელიგიური და კლანური დაპირისპირებებიც. ბინალი ჩამგოზი, როგორც სოციალური მედიით ირკვევა, ერზრუმის პროვინციიდან ერთ-ერთი ალევიტური სოფლიდან არის, სადაც ალევიტური აღმსარებლობის მოსახლეობა ცხოვრობს და შესაძლოა, დაჯგუფების რომელიმე წევრს, რომელიც ამ აღმსარებლობას ეკუთვნოდა, თავშესაფარი რელიგიურ ნიადაგზე მოეთხოვა, რადგანაც ალევიტების მდგომარეობა დღევანდელ თურქეთში საკმაოდ პრობლემატურია, მათ დევნიან. იზმირში "სახალხო რესპუბლიკური პარტიის" ამომრჩევლები ალევიტები არიან, ანუ მუნიციპალიტეტებს შიგნით ინტერესთა კონფლიქტი არსებობს, რაც ბევრი რამით არის გამოწვეული, მათ შორის, რელიგიური სოლიდარობა, კორუფცია...

ჩამგოზის ჯგუფთან დაკავშირებული ერთ-ერთი პერსონაა ჰასან არსლანი, არაერთ ფინანსურ სკანდალში იყო გახვეული.

ის ბოლო არჩევნებიდან მალევე ახალი ადმინისტრაციების ჩამოყალილების შემდეგ, ბინალის ხალხის გამოყენებით წილების შენარჩუნებას ცდილობდა. ფოჩას ახალი მერი, ფათიჰ გურბუზი კი, რომელიც ასევე ახალი არჩეულია, სიტუაციის კონსოლიდაციისა და მიზნებისთვის, ასევე ბინალის ჯგუფს იყენებდა... იმის გათვალისწინებით, რომ იზმირი სტამბოლის შემდეგ, ერთ-ერთ ყველაზე მდიდარ ქალაქად ითვლება, ინტერესთა კვეთაც დიდია. ასე რომ, საქმე საკმაოდ ჩახლართულია.