ელა იაკობაშვილი - სპორტული ცენტრის მდივნობიდან რუსეთის გავლენიანი ოლიგარქის ცოლობამდე

რამდენიმე წლის წინ რუსულმა Forbes-მა 10 ყველაზე მდიდარ ქალ ბიზნესმენს შორის, ქართველი მილიარდერის დავით იაკობაშვილის მეუღლეც დაასახელა.

ელა (ელადა) იაკობაშვილი მდიდარი რუსების სიაში, 102-ე ადგილზეა. რძის, წვენებისა და სასმელების მწარმოებელი უმსხვილესი კომპანიის Вимм-Билль-Данн-ის ერთ-ერთ დამფუძნებლის ცოლი, ებრაელთა მსოფლიო კონგრესის ვიცე-პრეზიდენტის გავრილა იუშვაევას ახლო ნათესავია და საფრანგეთში ცხოვრობს.

finanz.ru-ს ცნობით, 1988 წელს, იაკობაშვილმა, პარტნიორებთან ერთად მოსკოვში, პირველი საბჭოთა კოოპერატივი, გამაჯანსაღებელი სილამაზის ცენტრი Женьшен-ი და კომპანია Тринити დააფუძნა, სადაც მდივნის პოზიციაზე სამუშაოდ მივიდა ელა. წყვილმა 1991 წელს იქორწინა და მათ ერთი ვაჟი, მიხაილი ჰყავთ.

2019 წლის მონაცემებით, დავით იაკობაშვილის ქონება 1 მილიარდ დოლარს შეადგენს.

"ჩემი ცოლი საფრანგეთშია. მასთან, ყველა შესაძლებლობისთანავე, დასვენების დღეებში მივფრინავ. მომწონს გზაში ცხოვრება... ამასთან, ევროპაში ჩემი ბიზნესებიც მაქვს უძრავი ქონების სფეროში.

ხშირად მეკითხებიან - ასე ცალ-ცალკე ცხოვრების გამო, მარტოობას ვგრძნობ თუ არა. პასუხია არა - რადგან ჩვენ მუდმივად გვაქვს ურთიერთობა, ამის საშუალებას თანამედროვე ტექნიკა გვაძლევს. 20 წელია შევეჩვიე ასეთ ცხოვრებას. მთელი ჩემი ცხოვრება ოფისში მაქვს გატარებული, შინ მხოლოდ რამდენიმე საათს ვატარებ, ძირითადად, დასაძინებლად მივდივარ. ვიღვიძებ და ისევ სამსახურში მივდივარ, საქმე - ეს ჩემი ცხოვრების ძირითადი მიზანია" - ყვება დავით იაკობაშვილი ჟურნალ Итоги-სთან ინტერვიუში.

რაც შეეხება შვილს, რუსულ მედიაში მის შესახებ ბევრი არაფერი იწერება, გარდა იმისა, რომ 29 წლის მიხაილი Аква инвест-ის საოჯახო ბიზნესს უძღვება. ერთ-ერთი ინტერვიუს დროს, როცა მილიარდერს ჰკითხეს, სად სწავლობს მისი ერთადერთი ვაჟი, უფროსმა იაკობაშვილმა უპასუხა: "ცხოვრება საუკეთესო სასწავლებელია..."

ერთ-ერთი რუსული გამოცემა წერს, რომ რუსულ ბიზნესში სულ რამდენიმე, თითზე ჩამოსათვლელი ოლიგარქია, რომლებმაც წლების განმავლობაში ოჯახი შეინარჩუნეს, რაც უდაოდ მათი ცოლების დამსახურებაც არის. წერენ იმასაც, რომ ელა იაკობაშვილი თავის წარსულზე საუბრისას, ახლობლებთანაც კი ყოველთვის ფრთხილობს და თითქმის არაფერს ჰყვება.

"ელადა არც დასავლურ მედიაში აქტიურობს. რუსული მედიაში კი ადრე, წლების წინ, მხოლოდ მაშინ ჩნდებოდა, როდესაც აუცილებელი ეტიკეტის თანახმად, მიღებებზე მეუღლეს დაყვებოდა" - წერს მილიარდერის ცოლზე რუსული მედია.

ბოლო ხანებში, იაკობაშვილის მიმართ სახელმწიფო პოლიტიკა და მიდგომები შეიცვალა. "რუსეთიდან ებრაელი ოლიგარქები გარბიან" - წერს zavtra.ru და მაგალითად დავით იაკობაშვილის საქმიანობა მოჰყავს, რომელიც ამჟამად შვედეთის მოქალაქეა. გამოცემის ცნობით, მან თანდათან შეამცირა რუსეთში ბიზნესები და მხოლოდ სოციალურ პროექტებზე გადაერთო, ან სხვა ქვეყნებში გადაიტანა.

2019 წელს ბიზნესმენმა BBC-სთან ინტერვიუში ისაუბრა, რატომ არ სურს რუსეთში დაბრუნება. ამის მიზეზი, ФСБ-ეს მიერ ბიზნესმენის მუზეუმში - "Собрание"-ში ჩატარებული ჩხრეკა გახდა. იაკობაშვილის თქმით, არ დაბრუნდება ქვეყანაში, სადაც მსგავსი არაადეკვატური ქმედებები ხდება.

იაკობაშვილმა განათლება თბილისის ტექნიკურ უნივერსიტეტში მიიღო. ერთ-ერთი ვერსიით, მამამისი, "ცეხავიკების" საქმეში ფიგურირებდა, შემდეგ კი, ჩეჩნეთში გადაიხვეწა. რუსული მედიის ცნობით, რუსეთში მან ბიზნესი ბიძინა ივანიშვილთან ერთად დაიწყო.

ბოლო წლებში არაერთხელ გაეხვა სკანდალში, თუმცა, ბიზნესის კვალდაკვალ, რუსეთის ფედერაციის სავაჭრო-სამრეწველო პალატის მმართველი ორგანოს წევრი გახდა, არის რუსულ-ამერიკული ბიზნეს თანამშრომლობის საბჭოს პრეზიდენტი, ორგანიზაცია „რუსბრენდ“-ის დირექტორთა საბჭოს თავმჯდომარე. აგრეთვე არის, დავოსში მსოფლიო ეკონომიკური ფორუმისა და ნიუ-იორკის უნივერსიტეტის საერთაშორისო საბჭოს წევრი.

დავით იაკობაშვილი ხელოვნების ნიმუშების ცნობილი კოლექციონერიცაა. რუსული Forbes-ს ცნობით, მოსკოვის ცენტრში ანტიკვარული საათების და მექანიკური მუსიკალური ინსტრუმენტების მუზეუმის "Собрание"-ს გახსნა ბინზესმენს 600 მილიონი დოლარი დაუჯდა 2018 წელს. ცნობილია, რომ იაკობაშვილი მექანიკური მუსიკალური ინსტრუმენტების, საათებისა და ზარდახშების, რუსული ბრინჯაოს ნაკეთობების, მხატვრული ვერცხლის, რუსული და დასავლეთ-ევროპული ხელნაკეთი ნივთების შეგროვებით არის გატაცებული.