მიკროავტობუსებში მგზავრების ფეხზე დგომა შესაძლოა აიკრძალოს

თბილისის ვიცე-მერის, ირაკლი ხმალაძის განცხადებით, მიკროავტობუსებში მგზავრების ფეხზე დგომა შესაძლოა დასაშვები არ იყოს. ამის შესახებ ხმალაძემ ჟურნალისტებს განუცხადა. როგორც ვიცე-მერმა განმარტა, აღნიშნული გადაწყვეტილება კორონავირუსთნ დაკავშირებით შექმნილი საკოორდინაციო უწყებათაშორისმა საბჭოს მიიღო.

„ჯერჯერობით ახალი დავალებაა, რომ შეიძლება მოგვიწიოს რაოდენობრივი კონტროლის დაცვა, რომ არ მოხდეს საზოგადოებრივი ტრანსპორტის გადავსება, მაგალითად, მიკროავტობუსებში ფეხზე დგომა რომ არ დავუშვათ, სხვა შემთხვევაში ისევ მძიმე სურათი რომ არ მივიღოთ. ერთადერთი, რაც შემიძლია გითხრათ არის ის, რომ როგორც იანვარში იყო, 100%-იანი სრული გახსნა საზოგადოებრივი ტრანსპორტის არ მოხდება. თუმცა, ტრანსპორტი იმოძრავებს. საზოგადოებრივი ტრანსპორტის მიწოდება რაოდენობრივად და რეჟიმები იქნება იგივე. ჩვენი მთლიანი ავტოპარკი გავა სერვისში და მოემსახურება მოქალაქეებს. თუ ამან განაპირობა გარკვეული შეზღუდვა და ვიღაც ვერ გადაადგილდა, ეს, რა თქმა უნდა, მისთვის დისკომფორტია, თუმცა, ისევ უნდა გვახსოვდეს, რომ ეს ყველაფერი ხდება ჩვენივე მოსახლეობის უსაფრთხოების მიზნით“, - განაცხადა ხმალაძემ.

ცნობისთვის, 29 მაისიდან ყველა სახის მუნიციპალური ტრანსპორტი გაიხსნება. როგორც პრემიერ-მინისტრმა გიორგი გახარიამ საკოორდინაციო საბჭოს სხდომაზე განაცხადა, მგზავრობის დროს აუცილებელი იქნება პირბადის ტარება და ამას შესაბამისი სამსახურები გააკონტროლებენ.