კახეთიდან ლუგარის ცენტრში გაგზავნილი 28  ნიმუშიდან ყველა პასუხი უარყოფითია

გუშინ კახეთის რეგიონიდან ლუგარის ლაბორატორიაში გაგზავნილი 28 მოქალაქის ნიმუშიდან "კოვიდ-19" არცერთს არ დაუდასტურდა. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის კახეთის განყოფილების უფროსმა განაცხადა.

ნელი ხიზანიშვილის თქმით, რეგიონში არსებული ეპიდემიოლოგიური ვითარება კონტროლს ექვემდებარება.

"თვითიზოლაციაში 13 მოქალაქე იმყოფება, ოთხ ადამიანს სპეციალისტების მეთვალყურეობა მოეხსნა. კარანტინის სივრცეებში მოთვასებულია 219 მოქალაქე.

მაღალ რისკ ჯგუფებს, კერძოდ სამედიცინო პერსონალს, შშმ პირებს, მოხუცებულთა თავშესაფრების ბენეფიციარებს, მათ მომვლელებს, საერთაშორისო გადაზიდვების მძღოლებს, კარანტინში მყოფ პირებს და კარანტინის მომსახურე სასტუმროს პერსონალს გაფართოებული ანუ მიზნობრივი ტესტირების ფარგლებში იკვლევენ.

22 მაისს ლუგარის ცენტრში 28 ნიმუში გაიგზავნა და ყველა ნეგატიურია.

სულ კახეთის რეგიონში აღებული და ლუგარის ცენტრში გაგზავნილია 3662 ნიმუში, აქედან 1180 მედპერსონალს ეკუთვნის, 1365 კარანტინის ვიზიტორებსა და სასტუმროს პერსონალს", - განაცხადა ნელი ხიზანიშვილმა.