"გამოცდის დროს, ერთ სივრცეში არაუმეტეს 10 აბიტურიენტი იქნება" - რა შემთხვევაში გადაიწევს ეროვნული გამოცდები აგვისტოში

ერთიანი ეროვნული გამოცდები ჩატარდება იმავე ფორმატით და იმავე დროს, როგორც აქამდე ტარდებოდა, ანუ ივლისის თვეში - ამის შესახებ განათლების მინისტრმა მიხეილ ჩხენკელმა ისაუბრა.

მისი თქმით, გამოცდების ზუსტი თარიღები ივნისის თვეში გახდება ცნობილი. თუმცა, თუ ეპიდსიტუაცია მოითხოვს, ეროვნული გამოცდები შესაძლოა აგვისტოშიც იქნას გადატანილი:

"ივნისში მთელ საზოგადოებას ვაცნობებთ დეტალებს ეროვნულ გამოცდებთან დაკავშირებით. ივნისში ბევრად უფრო მკაფიო და უკეთესი სურათი გვექნება ეპიდსიტუაციასთან დაკავშირებით. ერთადერთი, რაც შეიძლება შეიცვალოს ეპიდსიტუაციის გათვალისწინებით, ეს არის თარიღები და გამოცდების აგვისტოში გადატანა, რაც მოხდება მხოლოდ იმ შემთხვევაში თუ ამას მოითხოვს ეპიდსიტუაცია და იქნება მკაფიო რეკომენდაცია სამედიცინო სფეროს წარმომადგენლებისგან.

თუმცა, კიდევ ერთხელ ხაზგასმით მინდა აღვნიშნო, ამ ეტაპზე გამოცდების არც ფორმატის და არც თარიღის ცვლილება არ განიხილება" - განაცხადა ჩხენკელმა.

მისივე განმარტებით, გამოცდების დროს ზედმიწევნით იქნება დაცული პროტოკოლები, რომელსაც ჯანდაცვის სამინისტროსგან მიიღებენ:

"მაგალითად, გამოცდის ჩატარების დროს, ერთ სივრცეში არაუმეტეს 10 აბიტურიენტი იქნება მოთავსებული. გარდა ამისა, იქნება მთელი ნუსხა პროტოკოლებისა, რომლის შესახებაც ივნისში, როცა თარიღებსაც გამოვაცხადებთ, გავაჟღერებთ ყველა დეტალს" - განაცხადა მინისტრმა.