ახალგაზრდა ექიმს, რომელმაც კორონავირუსი დაამარცხა, დაბადების დღე საკარანტინო სივრცეში მიულოცეს

თბილისის მედიცინის ინსტიტუტის ექიმს, დავით შავიშვილს, რომელიც კორონავირუსის დამარცხების შემდეგ, საკარანტინო სივრცეში გადის ორკვირიან საიზოლაციო პერიოდს, სასტუმროს პერსონალმა ნომერში მიულოცა დაბადების დღე.

ახალგაზრდა ექიმი იზოლაციაში გახდა 27 წლის.

"დიდი მადლობა ჩემი დღის გალამაზებისთვის, უღრმესი მადლობა ყველას მოლოცვისთვის და გამხნევებისთვის. დიდი მადლბა ინფექციურ საავადმყოფოს მთლიან გუნდს ზრუნვისთვის და ყურადღებისთვის. მადლობა სასტუმროს პერსონალს და სამედიცინო გუნდს, რომლებიც ახლა ზრუნავენ ჩემი და აქ მყოფი სხვა ადამიანების კეთილდღეობისთვის.

ყველაფერი მალე გაივლის და დავუბრუნდებით თითოეული ჩვენგანი ჩვეულებრივი ცხოვრების კალაპოტს. მადლობა ყველას, ვინც დამაფასეთ და გამოიჩინეთ ყურადღება. მე დავამარცხე კოვიდინფექცია, მალე მთელი მსოფლიო დაამარცხებს და ჩვენ ერთად ვიზაიმებთ ამ გამარჯვებას!

ვირუსთან მებრძოლ ადამიანებს კი გამძლეობას და მალე გამოჯანმრთელებას ვუსურვებ, რადგან ძალიან დიდი ფსიქოლოგიური მდგრადობაა საჭირო მთელი ამ ხნის განმავლობაში" - წერს დავით შავიშვილი.

თბილისის მედიცინის ინსტიტუტში, იგივე კლინიკა "თიმში", კორონავირუსით ექიმების ინფიცირების რამდენიმე შემთხვევა დადასტურდა, რის გამოც კლინიკა დროებით დაიხურება. კლინიკის დირექტორის, გიორგი კაჭახიძის ინფორმაციით, "თიმში" ჯამში 9 ადამიანი დაინფიცირდა - 2 ექიმი, 5 ექთანი და 2 პაციენტი.