სუს-ის თანამშრომელი უწყების შენობაში გარდაცვლილი იპოვეს

სახელმწიფო უსაფრთხოების სამსახურის შენობაში, ამავე სამსახურის თანამშრომელი ალუდა ზვიადაური გარდაცვლილი ნახეს. "კვირის პალიტრის" ინფორმაციით, ის უწყების სამეურნეო ნაწილში მუშაობდა.

ერთ-ერთი ვერსიით, მომხდარი თვითმკვლელობაა, თუმცა უცნობია, რატომ უნდა მოეკლა ახალგაზრდა კაცს თავი. მეორე ვერსიით, შესაძლოა მას იარაღი გაუვარდა.

ვარკეთილში იმ კორპუსის მცხოვრებლები, სადაც ალუდა ზვიადაური ცხოვრობდა, მისი გარდაცვალების ამბავს ადასტურებენ, თუმცა მომხდარის დეტალებზე ვერ საუბრობენ. სავარაუდოდ, ის სუს-ში შს მინისტრის, ვახტანგ გომელაურის რეკომენდაციით მოხვდა. ისინი წლებია ერთმანეთს იცნობენ. გომელაური ადრე ზვიადაურების მეზობლად ცხოვრობდა.

მომხდარ ფაქტს ადასტურებენ სუს-შიც.

"ვადასტურებთ სუს-ის თანამშრომლის გარდაცვალების ფაქტს. მომხდარ ფაქტზე მიმდინარეობს გამოძიება", - განუცხადეს AMBEBI.GE-ს სუსი-ს პრესსამსახურში.

გამოძიება სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.