"მოსახლეობის უდიდესი ნაწილი შიმშილობს... გამოვედი და ვმათხოვრობ" - ზურაბ ჯაფარიძის აქცია პრეზიდენტის სასახლესთან

პოლიტიკური პარტია „გირჩის“ ლიდერმა ზურაბ ჯაფარიძემ საქართველოს პრეზიდენტის სასახლესთან აქცია გამართა.

მას ხელში ილფის და პეტროვის ცნობილი ნაწარმოებიდან „12 სკამი“ ბანერი ჰქონდა წარწერით: je n'ai mange pas six jours - ექვსი დღეა რაც არ მიჭამია" . ჯაფარიძის განცხადებით, ქვეყანაში მოსახლეობის უდიდესი ნაწილი შიმშილობს. ის ადამიანები კი, რომლებიც დანაზოგზე ცხოვრობენ, თვლიან, რომ მათ ეს არ შეეხებათ და ხვალ მდგომარეობა შეიცვლება, სინამდვილეში კი ეს არ მოხდება.

„ეს არის საგანმანათლებლო აქცია, რომლის მიზანია ამ ქვეყნის მოქალაქეებს გავაგებინო, რომ როდესაც ისინი სახლში სხედან და პრობლემები არ აქვთ, მოსახლეობის უდიდესი ნაწილი შიმშილობს. რასაც ისინი ვერ აკეთებენ, მე გამოვედი და ვაკეთებ აქ, გამოვედი და ვმათხოვრობ, სამათხოვროდ დავჯექი. ამ ქვეყანაში ადამიანები შიმშილის ზღვარზე მიიყვანა საკუთარმა ხელისუფლებამ იმ ბევრი იდიოტური შეზღუდვის შედეგად, იქნება ეს “კომენდანტის საათი”, საგანგებო მდგომარეობა თუ სხვა,“ - აღნიშნა ზურაბ ჯაფარიძემ და დასძინა, რომ სპეციალურად დაჯდა პრეზიდენტის რეზიდენციის წინ.

"ხშირად რატომღაც ავიწყდებათ, რომ ეს ქალი, რომელიც ამ ქვეყანაში ჩამოვიდა დასასვენებლად და საპენსიო ასაკის გასატარებლად, არის ერთ-ერთი პასუხისმგებელი. ბიძინა ივანიშვილთან და მმართველ გუნდთან ერთად მისმა დეკრეტმა მიიყვანა ადამიანები შიმშილის პირამდე", - განაცხადა ჯაფარიძემ.