"ერთი კოვზით ზიარებას არ შევწყვეტთ... ჟურნალისტებო, ექიმებო, პოლიტიკოსებო შეეშვით ზიარების საიდუმლოს!" - დეკანოზი შალვა კეკელია

"სანამ ეს ქვეყანა არსებობას არ შეწყვეტს ერთი კოვზით წმიდა ზიარების მიღებას არ შევწყვეტთ" - ამის შესახებ სოციალურ ქსელში დეკანოზი შალვა კეკელია წერს.

"სანამ ეს ქვეყანა არსებობას არ შეწყვეტს, ჩვენ მართლმადიდებელი ქრისტიანები ერთი კოვზით წმიდა ზიარების მიღებას არ შევწყვეტთ. ურწმუნოებო, მცირედმორწმუნეებო, " თეოლოგებო", ჟურნალისტებო, ექიმებო, პოლიტიკოსებო...

შეეშვით ზიარების საიდუმლოს!!! სანამ უფრო დიდი სასჯელი არ დაგვატყდა თავს! ნუ გამოცდით ღმერთს!!! " - წერს კეკელია.

აღნიშნუ თემაზე ბოლო დღეებში პოლიტიკოსებისა და ჯანდაცვის სფეროს წარმომადგენლებისგან სხვადასხვა განცხადებები კეთდება. ჯანდაცვის მინისტრი ეკატერინე ტიკარაძე, ჟურნალისტის კითხვაზე, სარისკოა თუ არა ერთი კოვზით ზიარება პანდემიის დროს, ამბობს, რომ "საჭირო არის მეცნიერული კვლევა".

თუმცა საქართველოს პრემიერ-მინისტრმა გიორგი გახარიამ გუშინდელ ბრიფინგზე ხაზგასმით აღნიშნა, რომ საერთო კოვზით ზიარება ინფიცირების უდიდესი რისკის შემცველია.

"ეს აშკარაა, რომ ისევე როგორც ყველა სახის დისტანცია არის ერთადერთი საშუალება დღეის მდგომარეობით ამ ინფექციისგან თავის დაცვის, რა თქმა უნდა, კოვზიც არის ინფიცირების უდიდესი რისკის შემცველი,“ - აღნიშნა გიორგი გახარიამ, რითაც მან უპასუხა ჟურნალისტის კითხვაზე - არის თუ არა ზიარების დროს გამოყენებული საერთო კოვზი ინფიცირების წყარო და საჭიროა თუ არა სამეცნიერო კვლევა ამის დასადგენად," - აღნიშნა გახარიამ.

ანალოგიური განცხადება გააკეთა რამდენიმე დღის წინ ინფექციური საავადმყოფოს დირექტორმა თენგიზ ცერცვაძემაც.

"ყველას აქვს თავისი პოზიცია, ყველა მაინც გამოვდივართ იქედან, რომ ეს მაინც სენსიტიური თემაა და პატივს ვცემთ საქართველოს ეკლესიას, მაგრამ მე ყოველთვის ვაფიქსირებდი და ვაფიქსირებ ჩემს პოზიციას რომ, საერთო კოვზით ზიარება შეიცავს ინფექციის გავრცელების რისკებს და მას რაიმე განსაკუთრებული სამეცნიერო კვლევა არ სჭირდება" - განაცხადა ცერცვაძემ.