"შესაძლოა, თავყრილობების დროს ნიღბის ტარება კარგა ხანს დაგვჭირდეს და ამას უნდა შევეჩვიოთ" - ამირან გამყრელიძე

"შესაძლოა, დიდი თავყრილობების დროს ნიღბის ტარება კარგა ხანს დაგვჭირდეს და ამას უნდა შევეჩვიოთ" - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ „ფეისბუქ ლაივისას“ განაცხადა.

"რა თქმა უნდა, კორონა ბევრ რამეს შეცვლის, ამაზე ახლა ბევრი სჯელობა მიდის სხვადასხვა სფეროში, განსაკუთრებით, ეკონომიკურ სფეროში, იქნება ღრმა დეპრესია თუ არ იქნება.

არ მივცემ ჩემს თავს უფლებას, რომ დღეს არასამედიცინო საკითხებზე ვიმსჯელო, მაგრამ კორონა ასევე შეცვლის ერთ რამეს - შესაძლოა, დიდი თავყრილობების დროს ნიღბის ტარება კარგა ხანს დაგვჭირდეს და ამას უნდა შევეჩვიოთ. ხაზს ვუსვამ, ეს აუცილებლად სამედიცინო ნიღაბი არ უნდა იყოს, ახლა მას „სოციალური ნიღაბი“ დაერქვა. შეგიძლიათ სახლშიც შეკეროთ ასეთი ნიღაბი, თუ არადა არის მარლის ბევრი ნიღაბი.

როცა ახალგაზრდა ვიყავი, არ იყო სამფენიანი და ოთხფენიანი ნიღაბი, რომელზეც ახლა ერთი ამბავია, მშვენივრად ვიყენებდით საოპერაციოებში და სამედიცინო დაწესებულებებში ასეთ ნიღბებს

მადლობა მინდა გითხრათ ყველას, იმ 100 ათას ადამიანს, ვინც ქვეყანაში შარშან და წელს გრიპის საწინააღმდეგოდ აიცრა. ეს ყველაზე მაღალი მაჩვენებელი იყო. 100 ათასი ადამიანი სახელმწიფომ აცრა და კიდევ თუ არ ვცდები, 30 ათასი კერძო სექტორმა. ბოლო 5 წელიწადია, ქვეყანაში უზარმაზარი კულტურა ინერგება“,- განაცხადა გამყრელიძემ.

მისი თქმით, საქართველო გრიპის საწინააღმდეგო აცრისთვის 135 ათას დოზას შეისყიდის.

„პირველი რჩევაა, მაქსიმალურად დავიცვათ თავი და გრიპის საწინააღმდეგოდ დროულად ავიცრათ. ჩვენ წელს 135 ათას დოზას შევისყიდით და დღეს შესყიდვაზე კონტრაქტი გავაფორმეთ. დღეს სამინისტროში ასევე დავაყენე საკითხი, რომ დამატებით გამოიყოს თანხები, რათა ათეული და მეტი დოზა შევისყიდოთ. წელს იმ 100 ათასმა აცრამ ნამდვილად იმუშავა, რომ ჩვენ გრიპის სეზონი მშვიდად გადავიტანეთ და არ გვქონდა ორი ინფექციის ზედდება მარტში ან აპრილში“,- განაცხადა დაავადებათა კონტროლის ეროვნული ცენტრის ხელმძღვანელმა.