"დაუჭრელი და ცოცხალი ვარ" - არ­ქი­მან­დრი­ტი საბა ყინ­წვი­სის მონასტერში მომხდარზე პირველ კომენტარს აკეთებს

ყინწვისის კეთილგონიერი ავაზაკის სახელობის ახალი მონასტრის წინამძღვარი, არქიმანდრიტი საბა ჟღენტი მის დაჭრასთან დაკავშირებით გავრცელებულ ინფორმაციაზე პირველ კომენტარს აკეთებს. არქიმანდრიტის თქმით, ყინწვისის მამათა მონასტრის წინამძღვარს, მამა დავით აქიაშვილს ის არ დაუჭრია და საერთოდ არავითარი დაზიანებები არ აღენიშნება.

"გულნატკენი და ნაწყენი ვარ, რომ ასეთ ცრუ ინფორმაციას ავრცელებენ, ძალიან ცუდია ეს ყველაფერი. ჩვენ მშობლები, მეგობრები, ახლობლები გვყავს და ასეთი ცრუ ინფორმაცია რომ ვრცელდება, ვიღაცაზე ეს ცუდად მოქმედებს… ძალიან ძნელია ამ ყველაფრის ატანა... მხედავთ, როგორ ვარ და რა მდგომარეობაში ვარ, დაუჭრელი და ცოცხალი ვარ, მადლობა ღმერთს. დღეს ჩავატარეთ მსახურება", - განაცხადა სასულიერო პირმა "ტვ პირველის" ეთერში.

ჟურნალისტის შეკითხვაზე, რატომ დაიწყო შსს-მ გამოძიება იარაღის უკანონოდ შეძენა/შენახვის მუხლით, არქიმანდრიტი ამბობს, რომ არ იცის.

„შსს-მ ჩაატარა ოპერაცია, საიდან ამოიღო ის იარაღი, მე არ ვიცი, ვის ჰქონდა იარაღი… შსს ბევრ სამუშაოს ატარებს და ბევრგან აქვს იარაღი ამოღებული, მე რომ ეს ინფორმაცია მქონდეს, მაშინ ტაძრის წინამძღვარი კი არა, ვიქნებოდი შინაგან საქმეთა მინისტრი და მეცოდინებოდა, რომელი იარაღი საიდან და რა მუხლით ამოიღეს. მე ვარ კეთილგონიერი ავაზაკის სახელობის მონასტრის წინამძღვარი საბა ჟღენტი, არქიმანდრიტი...

მე უარვყოფ იმას, რომ აქ საბას კოშკში, კეთილგონიერი ავაზაკის სახელობის ტაძარში რაიმე ოპერაცია ჩატარდა და იარაღი ამოიღეს. მამა დავითთან რა მოხდა ყინწვისში და რა გააკეთეს, ეს მე არ ვიცი. ეს მამა დავითს უნდა ჰკითხოთ. მე არ მაქვს ინფორმაცია...

აქედან რაც ჩანს, არ ჩატარებულა ყინწვისის მამათა მონასტრში მსგავსი ოპერაცია, რომ ამოსულიყვნენ თანამშრომლები და რაიმე იარაღი ამოეღოთ. ძმობა და ურთიერთობა გვაქვს და მსგავსი ინფორმაცია არ გაგვიგია", - განაცხადა სასულიერო პირმა.

"რუსთავი 2"-ის ინფორმაციით, ყინწვისის მამათა მონასტრის ტერიტორიაზე კრიმინალური ფაქტი მოხდა, რა დროსაც, ყინწვისის მამათა მონასტრის წინამძღვარმა მამა დავითმა, სავარაუდოდ ცეცხლსასროლი იარაღით დაჭრა ყინწვისის კეთილგონიერი ავაზაკის სახელობის ახალი მონასტრის წინამძღვარი, არქიმანდრიტი საბა ჟღენტი. ტელეკომპანიის ინფორმაციით, შემთხვევას რუის-ურბნისის მიტროპოლიტი მეუფე იობიც შეესწრო. თუმცა, დაპირისპირების შესახებ გავრცელებულ ინფორმაციას, მეუფე იობის წარმომადგენელი სიცრუეს უწოდებს.

შინაგან საქმეთა სამინისტროში აცხადებენ, რომ ფაქტზე არავინ დაუკავებიათ, თუმცა გამოძიება სისხლის სამართლის კოდექსის 236-ე მუხლით მიმდინარეობს, რაც ცეცხლსასროლი იარაღის, საბრძოლო მასალის, ფეთქებადი ნივთიერების, ან ასაფეთქებელი მოწყობილობის მართლსაწინააღმდეგო შეძენას-შენახვას, ტარებას, დამზადებას, გადაზიდვას, გადაგზავნას, ან გასაღებას გულისხმობს.