"ამ უმძიმესი კრიზისის დროს ყველას უთხრა, რომ ფეხებზე მკიდიხართო" - გიგა ბოკერია ბერას Tik-Tok-ზე  გავრცელებულ ვიდეოზე

ეს არის მთელი საზოგადოების, ჩვენი მოქალაქეების შეურაცხყოფა, - ასე გამოეხმაურა „ევროპული საქართველოს“ ერთ-ერთი ლიდერი, გიგა ბოკერია, ბერა ივანიშვილის მიერ სოციალურ ქსელ Tik-Tok-ზე გამოქვეყნებულ ვიდეოს, რომელშიც „ქართული ოცნება-დემოკრატიული საქართველოს“ თავმჯდომარე ბიძინა ივანიშვილია გადაღებული.

მისი თქმით, კაცი, რომელიც ამ უმძიმესი კრიზისის დროს არ დალაპარაკებია არავის, ასე მიეგება საზოგადოებას.

"ეს არის პირდაპირ შეურაცხყოფა მთელი საზოგადოების, ჩვენი მოქალაქეების. ამ ქვეყნის დე ფაქტო მმართველია, ფორმალურად მმართველი, პარტიის თავმჯდომარეა, ყველაფერს წყვეტს ის.

ამ უმძიმესი კრიზისის დროს არ დაგვლაპარაკებია არავის, არც ერთ მის მოქალაქეს, ერთი სიტყვა არ უთქვამს, რას ფიქრობს, რა ხედვა აქვს და აი ასე მიეგება საზოგადოებას. პირდაპირ უთხრა ყველას, რომ ფეხებზე მკიდიხართო.

ამხელა ამბავი ნორმალურ ვითარებაში კი არ იქნებოდა ეს, რა თქმა უნდა, უბრალოდ გემოვნების საკითხი იქნებოდა, ვინ რითი ერთობა, მაგრამ ამ კონტექსტში, ეს არის შეურაცხყოფა და გარკვევით თქმა იმის, რომ ფეხებზე ჰკიდია მთელი ეს ქვეყანა", - განაცხადა გიგა ბოკერიამ.

ცნობისთვის, სოციალურ ქსელ Tik-Tok-ზე ვიდეოში ბიძინა ივანიშვილი გამოჩნდა, რომელიც სოციალურ ქსელში ბერა ივანიშვილმა განათავსა.