რა იარაღით განახორციელა გასროლა პოლიციელმა, რომელმაც მოპირდაპირე კორპუსში ქალი იმსხვერპლა

პოლიციელმა, რომელმაც აღდგომის ღამის გასროლის შედეგად ბრმა ტყვიით 50 წლის ქალი იმსხვერპლა, "ვიკინგის" მოდელის ცეცხლსასროლი იარაღიდან განახორციელა გასროლა.

ამის შესახებ პროკურატურის მიერ გავრცელებულ განცხადებაში ვკითხულობთ.

უწყების ინფორმაციით, ალკოჰოლური სიმთვრალის მდგომარეობაში მყოფმა სოსო გაბრიაძემ, თავისი საცხოვრებელი ბინის აივნიდან, დაახლოებით 21:00 საათზე, როდესაც ქვეყანაში გამოცხადებული იყო საგანგებო მდგომარეობა და მოსახლეობა იმყოფებოდა სახლებში, თავისი კუთვნილი "ვიკინგის" მოდელის ცეცხლსასროლი იარაღიდან განახორციელა რამდენიმე გასროლა საცხოვრებელი კორპუსების მიმართულებით. რის შედეგადაც მიმდებარე კორპუსში მცხვრები 50 წლის თამარ ანთელავა იმსხვერპლა.

ბრალდებულის საცხოვრებელი ბინის ჩხრეკის შედეგად, ამოღებულ იქნა გასროლილი ტყვიის 13 მასრა და პოლიციელის საკუთრებაში არსებული „ვიკინგის’’ ტიპის ცეცხლსასროლი იარაღი.

თავდაპირველად ვრცელდებოდა ინფორმაცია, რომ იარაღი, საიდანაც გასროლა განხორციელდა, იყო "მაკაროვის" ტიპის, თუმცა ამან ეჭვები გააჩინა, რადგანაც გასროლა თითქმის ნახევარი კილომეტრის მანძილიდან იყო განხორციელებული, რაც "მაკაროვიდან" გასროლას გამორიცხავდა.

რაც შეეხება "ვიკინგს", ის რუსული წარმოების იარაღია, მის აღწერაში ვკითხულობთ, რომ მჭიდში 18 ტყვია ეტევა. Mр-446 ვიკინგი შეიქმნა გასული საუკუნის 90-იანი წლების ბოლოს რუსეთში, იჟევსკის მექანიკურ ქარხანაში.