სანზონაში, სადაც მუხრანისა და ტიბაანის ქუჩების კუთხეში გამავალი მაგისტრალური გაზსადენი ავტომანქანის შეჯახების შედეგად დაზიანდა, ბუნებრივი აირი 6000-მდე აბონენტს შეუწყდა.
მუხრანის ქუჩის მცხოვრებლები, რომლებიც გაზის მილის დაზიანების გამო დროებით საცხოვრებელი სახლისგან მოშორებით იყვნენ, საკუთარ სახლებში უკვე დაბრუნდნენ. როგორც "ინტერპრესნიუსს" შინაგან საქმეთა სამინისტროში განუცხადა, ადგილზე გაზი მალევე გადაიკეტა, ჰაერიც გაიწმინდა და ის მოქალაქეებისთვის საფრთხეს აღარ წარმოადგენს.
მათივე ინფორმაციით, შემთხვევა რამდენიმე საათის წინ მოხდა. არაოფიციალური ინფორმაციით, გაზის მილს მანქანა შეეჯახა, მძღოლი კი ავტომობილით შემთხვევის ადგილიდან გაიქცა.
როგორც შსს-ში ამბობენ, ფაქტის დეტალების შესწავლა მიმდინარეობს და მიღებულია უსაფრთხოების ზომები.
"ევაკუაცია აღარაა. ყველა სახლშია უკვე. ფაქტის დეტალების შესწავლა მიმდინარეობს და მიღებულია უსაფრთხოების ზომები. ჟონავდა გაზი და შესაბამისად, იქვე ახლომდებარედ ვინც ცხოვრობდა და ფრთხილობდა, აირს ინტოქსიკაცია არ გამოეწვია, ისინი გამოვარიდეთ დროებით ტერიტორიას, ახლა ისევ შებრუნდნენ. გადაიკეტა გაზი, გზაც გაიხსნა და ყველაფერი აღდგა", - განაცხადეს შსს-ში.
როგორც "ინტერპრესნიუსს" "თბილისი ენერჯიდან" აცნობეს, შემთხვევის ადგილზე მობილიზებულია კომპანია "თბილისი ენერჯის" სამსახური და მიმდინარეობს საშუალო წნევის მილსადენის აღდგენითი სამუშაოები.
"გაცნობებთ, რომ ავარიის გამო გაზის მიწოდება შეუწყდა სანზონის (ღრმაღელის) 6000-მდე აბონენტს. კერძოდ - დასახლების კორპ. N 1, 2, 3, 4, 5, 6, 7, 8, 9, 10, 11, 12, 13, 14, 15, 16, 18, 19, 20, 21, 24, 25, 26, 27, 28, გურამიშვილის გამზ. 15, 15ბ, 19, 19ა, 21, 23, გუდამაყრის ქ. 5, 7, 7ა, 7ბ, ლიახვის ქ. 1, ჩარგლის ქ. 25, 26, 35, მეტრო "ღრმაღელესთან” სავაჭრო ცენტრის მიმდებარედ (იგივე დ. გურამიშვილის გამზ. 23ა) შპს "ჯორჯიან ჰაუსი”-ს მრავალბინიანი საცხოვრებელი კორპუსების მოსახლეობას, ასევე მუხრანის, ჩარგლის, ნაგომარის, გლინკას, ხორნაბუჯის, თიანეთის, ნ. შენგელაიას, ზიგზაგის, გვაზაურის, ლიახვის, რატევანის, ჟინვალის, ჭოპორტის, დ. გარეჯელისა და ბოგვის ქუჩების კერძო სექტორის მოსახლეობის ნაწილს, ასევე აღნიშნულ ტერიტოიაზე განთავსებულ კომერციულ და საბიუჯეტო ორგანიზაციებს, მათ შორისაა ჩარგლის ქუჩაზე მდებარე საბავშვო ბაგა-ბაღი N31, საჯარო სკოლა N32, სკოლა N207 და სხვა.
ბუნებრივი გაზის მიწოდება აღდგება ხვალ 21 აპრილს 10.00 სთ-დან და დასრულდება 16:00 სთ-მდე. კომპანია თბილისი ენერჯი ბოდიშს გიხდით ჩვენგან დამოუკიდებელი მიზეზებით შექმნილი დისკომფორტის გამო. გთხოვთ დაიცვათ გაზის უსაფრთხო მოხმარების წესები," - ნათქვამია კომპანიის მიერ გავრცელებულ განცხადებაში.
