ლონდონში COVID-19-ით გარდაცვლილი 13 წლის ბიჭის დაკრძალვას, ოჯახი ვერ დაესწრო - მშობლებმა ცერემონიას პირდაპირ ეთერში უყურეს

მსოფლიოში კორონავირუსით ინფიცირებულთა რაოდენობა ყოველდღე ათი ათასობით იზრდება. ბევრი ქვეყანა ვერ უმკლავდება ეპიდემიას და ადამიანებს ურთულეს ვითარებაში უწევთ ცხოვრება. მათ შორის არიან ისეთი განვითარებული ქვეყნები, როგორებიცაა აშშ, დიდი ბრიტანეთი, გერმანია, იტალია, საფრანგეთი და ესპანეთი.

ვითარება იმდენად რთულია, რომ ადამიანები ოჯახის წევრის დაკრძალვაზეც კი ვერ ახერხებენ წასვლას, რაც საყვარელი ადამიანის დაკარგვით გამოწვეულ ტკივილს კიდევ უფრო ამძიმებს.

ერთ-ერთ ასეთ შემთხვევაზე წერს ბრიტანული გამოცემა BBC-იც. გამოცემის ინფორმაციით, ლონდონში COVID-19-ით გარდაცვლილი 13 წლის ბიჭის დაკრძალვას ოჯახის ვერც ერთი წევრი ვერ დაესწრო, რადგანაც ყველა მათგანი იზოლაციაშია.

13 წლის ისმაილ მოჰამედ აბდულვაჰაბი სამხრეთ ლონდონიდან, ბრიქსტონიდან იყო და ის COVID-19-ით King's College Hospital-ში გარდაიცვალა. ვირუსი მას 26 მარტს დაუდგინეს.

ოჯახის მეგობრის თქმით, ისინი განადგურებულები არიან. მშობლებმა შვილის დაკრძალვას პირდაპირ ეთერში უყურეს. როგორც BBC წერს, გარდაცვლილის უმცროს ძმასა და უფროს დას ვირუსის სიმპტომები აქვთ, მათ შორის მაღალი ტემპერატურა და გემოს შეგრძნების დაკარგვა.

აღსანიშნავია, რომ ისმაილს არ ჰქონია თანმდევი დაავადებები. ოჯახის მეგობრები ამბობენ, რომ ბიჭი ყოველთვის მოუწოდებდა დანარჩენებს, გაეთვალისწინებინათ ჯანდაცვის ორგანიზაციის წარმომადგენლებისა და ხელისუფლების რეკომენდაციები.

დიდ ბრიტანეთში ბოლო მონაცემებით 98 476 ადამიანი დაინფიცირდა, რომელთა შორისაც 12 868 გარდაიცვალა.