საქართველოს 4 დიდ ქალაქში ხვალიდან შესვლა-გამოსვლა იკრძალება - პრემიერის საგანგებო განცხადება

მთავრობის გადაწყვეტილებით, საქართველოს ოთხ დიდ ქალაქში 10 დღით ყველა სახის ტრანსპორტით შესვლა და გამოსვლა იკრძალება.

ამის შესახებ პრემიერმა კორონავირუსთან დაკავშირებით მოქმედი უწყებათაშორისი საკოორდინაციო საბჭოს დასრულების შემდეგ, კანცელარიაში გამართულ ბრიფინგზე ისაუბრა. საბჭოს სხდომა თითქმის 7 საათის განმავლობაში მიმდინარეობდა მთავრობის ადმინისტრაციაში.

"სამწუხაროდ, გვაქვს პირველი შემთხვევა, როდესაც ერთი დღის განმავლობაში 30 ადამიანია ინფიცირებული და კვლევა მიმდინარეობს 500 ადამიანზე. შესაბამისად, ქვეყანაში სრულმასშტაბიანი შიდა გავრცელების ეტაპზე გადავედით. დღეს შეუძლებელია პიკის პროგნოზირება, ამიტომ მთავრობის მოქმედებას აქვს დიდი მნიშვნელობა.

მთავრობამ მიიღო გადაწყვეტილება, ხვალიდან, 15 აპრილის 21 საათიდან ოთხ დიდ ქალაქში - თბილისში, რუსთავში, ბათუმსა და ქუთაისში ყველა სახის მოძრაობა (შიგნით არა) - შესვლა და გამოსვლა, აიკრძალოს 10 დღით" - განაცხადა გახარიამ.

პრემიერის თქმით, აღნიშნული გადაწყვეტილება მიზნად ისახავს მსხვილ ქალაქებში მობილობის და ზედმეტი გადაადგილების შემცირებას.

ამას გარდა, გახარიას თქმით, მთავრობა მიმართავს პრეზიდენტს, რათა მან მიმართოს პარლამენტს და საგანგებო მდგომარეობის გაგრძელება ქვეყნის მთელს ტერიტორიაზე მოხდეს ათ მაისამდე.