"კორონავირუსით ინფიცირებული ბიჭი სოფელ ითხვისში სამძიმარზე იმყოფებოდა" - ჭიათურის მერი ახალ შემთხვევაზე

ჭიათურის მერის, გივი მოდებაძის განცხადებით, კორონავირუსით დაინფიცირებული პირი სოფელ ითხვისში სამძიმარზე იმყოფებოდა. როგორც მოდებაძემ „ინტერპრესნიუსს” განუცხადა, ინფიცირებულთან კონტაქტში მყოფი 5 პირი გამოვლენილია და ისინი თვითიზოლაციაში არიან.

„ეს ბიჭი, რომელიც დედასთან ჩამოვიდა, თბილისში ცხოვრობს. ჭიათურაში, პრაქტიკულად, დღენახევარი იყო. აქედან წავიდა და კოვიდ-19 აღმოაჩნდა. დედა და სხვა პირები, ვისთანაც ჰქონდა კონტაქტი, ყველა შესწავლილია. სულ 5 ადამიანთან ჰქონდა კონტაქტი. ჭიათურელი ეპიდემიოლოგების მიერ კიდევ დამატებითი შესწავლა ხდება და ყველა არის იზოლირებული. თუ რომელიმეს კორონავირუსი დაუდგინდა, მათი გადაყვანა მოხდება. ეს ბიჭი სამძიმარზე იყო, ქელეხი არ ყოფილა, ერთი შემოვლა გააკეთა, გაჩერდა სოფელში და წავიდა. ეს არის ითხვისის ერთ-ერთი პატარა კუთხე, ძალიან პატარა სოფელია. არ გასულა ფართოდ, არ უვლია”, - განაცხადა ჭიათურის მერმა.

ცნობისთვის, მამაკაცს, რომელიც ხუთი დღის წინ ჭიათურის სოფელ ითხვისში საკუთარ ოჯახში თბილისიდან ჩავიდა, კორონავირუსი დაუდასტურდა.

სოფელში ეპიდემიოლოგები მუშაობენ. იმერეთის გუბერნატორის, ზვიად შალამბერიძის ინფორმაციით, ჯერჯერობით იქ ზომების გამკაცრება არ იგეგმება და თუ ვითარება შეიცვლება, საჭირო ზომები გატარდება.