"COVID-19 დაუდგინდა მამაკაცს, რომლის შვილი მოლარეა... ეროვნული ბანკის კლასტერს უნდა მიეკუთვნებოდეს" - ექიმი

თბილისის ზღვის ჰოსპიტალის კრიტიკული მედიცინის დეპარტამენტის ხელმძღვანელის მარეხი ბექაის განცხადებით, კორონავირუსზე გაგზავნილი 34 ტესტიდან დადებითი პასუხი ერთ პირს მოუვიდა. მისივე თქმით, პაციენტი ხანდაზმული მამაკაცია და მისი მდგომარეობა არის საშუალო სიმძიმის.

"ამჟამად კლინიკაში იმყოფება 49 პაციენტი. გუშინ 34 კვლევა იქნა გაგზავნილი ლუგარის ლაბორატორიაში. აქედან ერთი დადებითი პასუხი მივიღეთ. ეს არის ხანდაზმული მამაკაცი. ამჟამად მისი მდგომარეობა საშუალო სიმძიმისაა. პაციენტის შვილი არის მოლარე, თუმცა არ დავასახელებ სად.

მას ერთი კვირის წინ აღენიშნებოდა ტემპერატურული რეაქცია და მშრალი ხველა. რადგან შვილი არის მოლარე, ეროვნული ბანკის კლასტერს უნდა მიეკუთვნებოდეს ალბათ, რადგან ფულთან ჰქონდა შეხება. დაინფიცირებული პაციენტი ალბათ პირველ საუნივერსიტეტო კლინიკაში გადავა.

მისი მდგომარეობა არის საშუალო სიმძიმის. შვილს დადასტურებული არ აქვს ვირუსი. ეს გადაეგზავნა ეპიდსამსახურებს კვლევისათვის და გაგრძელდება კვლევა. ამ კაცს სხვასთან არავისთან ჰქონია შეხება, არის შშმ პირი და პრაქტიკულად სახლიდან არ გადის", - განაცხადა ბექაიამ.