"87 წლის მამაკაცი კორონავირუსით გარდაცვლილი ქალის მეუღლეა" - უახლესი ცნობები ბოლნისიდან და მარნეულიდან, სადაც 2 ახალი ინფიცირებულია

ქვემო ქართლში, ბოლნისსა და მარნეულში კორონავირუსის ორი ახალი შემთხვევა დაფიქსირდა, - აღნიშნულის შესახებ ჟურნალისტებს ქვემო ქართლში სახელმწიფო რწმუნებულმა შოთა რეხვიაშვილმა განუცხადა.

როგორც შოთა რეხვიაშვილი განმარტავს, ერთ-ერთი დაინფიცირებული 87 წლის მამაკაცი კორონავირუსით გარდაცვლილი ქალის მეუღლეა.

„დღეის მდგომარეობით, ორი დადასტურებული ფაქტი დაგვემატა, ერთი ბოლნისში და მეორე მარნეულში. ქვემო ბოლნისის კლასტერი რამდენიმე დღის წინ გარდაცვლილ ასაკოვან ქალბატონს უკავშირდება და ეს ადამიანი მისი 87 წლის მეუღლეა, მას დაუდასტურდა კორონავირუსის ფაქტი და გადაყვანილია თბილისში, ერთ-ერთ კლინიკაში. ეს ცნობილი კლასტერია. აღნიშნულ მამაკაცსაც ქორნიკული დაავადებები აქვს და როგორც ვიცი, მარტივი მდგომარეობა არ არის.

რაც შეეხება მარნეულის ფაქტს, მარნეულში აზერბაიჯანის საზღვრისპირა სოფელია კირაჩმუღანლო და იქიდან ერთ-ერთ ქალბატონს კორონავირუსი დაუდასტურდა. ცნობილია, რომ მან დაახლოებით, 13 მარტს გადმოკვეთა საზღვარი. მასთან კონტაქტების დადგენა ამ წუთამდე გრძელდება, უკვე 25 ადამიანი, ვინც სავარაუდოდ, მასთან მჭიდრო კომუნიკაციაში იყო, მკაცრ თვითიზოლაციაშია. აქამდე მხარეში 21 დადასტურებული ფაქტი იყო და 23 გახდა. რაც შეეხება რუსთავს, სტატისტიკა უცვლელია. ასევე მქონდა კომუნიკაცია, ვინც თვითიზოლაციაშია და ნაწილობრივ მათთანაც, ვინც დადასტურებული ფაქტით მკურნალობს. მკურნალობა ნორმალური დინამიკით მიდის, კარანტინში მყოფთათვის მე-12 დღეა და დაავადების არავითარი სიმპტომი არ არის“, - განაცხადა რეხვიაშვილმა.

მისივე განმარტებით, ქვემო ქართლში კლინიკები პაციენტების მისაღებად მზად არის.

„მარნეულის პირველ დადასტურებულ ფაქტთან კომუნიკაციაში 80 ოჯახი იყო, რომელთა ხელახალი თერმოსკრინინგიც დღეს დაიწყო, ხვალ დაიწყება ქვემო ბოლნისში, 10 აპრილს კი განმეორებითი თერმოსკრინინგი დანარჩენ ტერიტორიაზე დაიწყება. ბუნებრივია, გარკვეული პიკური პერიოდი იწყება. ჩვენ ჩვენი რესურსებიდან გამომდინარე მხარეში 9 ჰოსპიტალური ტიპის დაწესებულება გვაქვს, მათგან ერთი ბავშვთა საავადმყოფოა, სულ 487 საწოლია, 98 ცხელების ნიშნებით გათვალისწინებული საწოლი გვაქვს, 60 სასუნთქი აპარატი, 68 ბოქსირებული პალატა, ეს ყველაფერი რუსთავში, ბოლნისში და მარნეულშია. საჭიროება არ იყოს, თორემ ნებისმიერი გამოწვევისთვის მზად ვართ. ცხელებით მიმართვიანობის მომეტებული საჭიროება თუკი იქნება, რესურსი საკმარისია იმისთვის, რომ კლინიკები აუვიდეს. ამასთან, რუსთავში თვიზოლაციაში დაახლოებით, 60 ადამიანი იმყოფებოდა. საკრანტინე სივრციდან მათ შორის, მარნეულიდან დღეს 27 ადამიანი ჯანმრთელად ჩათვლილი, თვითმმართველობის ორგანიზებით თავის საცხოვრებელს დაურუნდება, ხვალ კი დაახლოებით, 50-ზე მეტი ადამიანი წავა ისევ მარნეულიდან თავის საცხოვრებელში“, - განაცხადა რეხვიაშვილმა.