ფოტოები ჩერნობილიდან, სადაც რადიაციის ზონაში გაჩენილ ხანძარს ამ დრომდე ვერ აქრობენ

უკრაინაში, ჩერნობილის ტყეში ხანძრის ჩაქრობა ამ დრომდე ვერ ხერხდება. ინფორმაციას ამის შესახებ "ესოშიეითიდ პრესი“ ავრცელებს.

არსებული ცნობებით, მეხანძრეებმა შეძლეს ერთ-ერთი კერის ლოკალიზება, რომელიც დაახლოებით 5 ჰექტარზე იყო მოდებული. რაც შეეხება მეორე კერას, იქ ხანძარი 20 ჰექტარ ტყის მასივს უკიდია.

სხვადასხვა გამოცემები წერენ, რომ ჩერნობილში ამ დროისთვის რადიაცია 16-ჯერაა გაზრდილი, თუმცა უკრაინაში აცხადებენ, რომ კიევში, რომელიც ტერიტორიიდან 100 კილომეტრითაა დაშორებული, ეს მაჩვენებელი ნორმაშია.

უკრაინული მედიის ინფორმაციით, ხანძარი შაბათს, 4 აპრილს გაჩნდა. ცეცხლის ჩაქრობის ოპერაციაში ჩართულია ავიაციაც, თუმცა მის ჩაქრობას რადიაციული ფონი ართულებს. არსებული ცნობით, ცეცხლი ჩერნობილის ატომური ელექტროსადგურის რადიაციის გაჟონვის ზონაში, ვლადიმიროვკა-კოტოვსკის დასახლებასთან ახლოს გაჩნდა.

ცნობისთვის, 1986 წელს უკრაინის ქალაქ ჩერნობილში ატომურ რეაქტორზე კატასტროფა მოხდა. რეგიონებში, რომლებიც დღემდე რადიოაქტიურად დაბინძურებულად ითვლება, 5 მილიონამდე ადამიანი ცხოვრობს.

ფოტოები საიტიდან gordonua.com